पालघरच्या तन्वीशची इंग्लंडमध्ये छाप

नरेंद्र पाटील, पालघर

इंग्लंडच्या लेलसेस्टर सिटी येथे आयोजित केलेल्या ‘कलर क्लोथिंग २०-२०’ क्रिकेट मॅचमध्ये भारतीय क्रिकेट संघातर्फे खेळणाऱ्या पालघर तालुक्यातील तन्व‌ीश वझेने ‘मॅन ऑफ द सीरिज’ हा किताब पटकावला आहे. तन्वीशने वन डे मॅचमध्ये सलग दोन शतके झळकवून धवांचा अक्षरशः पाऊस पाडला. त्याचा या कामग‌िरीबद्दल सध्या त्याचे तालुक्यामध्ये कौतुक होते आहे.

तन्वीश पालघरमधील दांडीचा रह‌िवासी असून त्याचे वडील रिक्षाचालक आहे. अत्यंत गरीब घरातील या मुलांमध्ये प्रचंड प्रतीभा लपलेली आहे. तन्वीशने चिंचणीच्या के. डी. हायस्कुलमधून खेळताना अनेक स्पर्धांमध्ये आपली चुणूक दाखवली आहे. त्याच्या सातत्यपूर्ण खेळीची दाखल घेत सन २०१४मध्ये मुंबई क्रिकेट असोसिएशनने त्यांची अवघ्या १२व्या वर्षी १४ वर्षांखालील मुंबई टीममध्ये निवड केली.

तन्वीशचे स्पर्धेतील सातत्य पाहून एप्रिल २०१४मध्येच त्याची निवड १५ वर्षांखालील भारतीय संघात झाली. पुढचा टप्पा भारतीय संघ आहे, हे ध्येय समोर ठेऊन त्याने आता सरावाला सुरुवात केली आहे. चिंचणीचे यतीश अक्रे आण‌ि वडराईच्या भारत चामरे या क्रिकेट मार्गदर्शकांच्या हाताखाली क्र‌िकेटचे धडे ग‌िरवून त्याने या खेळामध्ये प्राविण्य मिळवले आहे.

मलेश‌िया वारी

मलेशिया येथे सामना खेळण्यासाठी जाण्याचा निरोप मिळताच तन्वीशला जणू आभाळच ठेंगणे वाटू लागले. मात्र या दौऱ्यासाठी येणारा खर्चा आपल्या वड‌िलांच्या ख‌िशाला परवडणार नाही, त्यामुळे समोरून आलेली ही संधी हुकणार, अशी भीती तन्वीशला वाटू लागली. मात्र विरार येथे राहणारे एमसीएचे सदस्य सिद्धार्थ ठाकूर यांना ही बाब समजताच त्यांनी क्षणाचाही विलंब न करता तन्वीशच्या दौऱ्याचा खर्च उचलण्याचा निर्णय घेतला आण‌ि तन्वीश मलेश‌ियाला रवाना झाला. त्या स्पर्धेत भारतीय संघाने अजिंक्यपद तर मिळवलेच त्याचबरोबर तन्वीशने उत्कृष्ट गोलंदाज म्हणून सन्मान मिळवला. या सीरिजमध्ये तन्वीशने एकूण २८० धावा, १६ बळी आणि ११ झेल घेत ‘मॅन ऑफ द सीरिज’ हा किताब मिळवला. तन्वीश सध्या भारतीय संघात खेळत असलेल्या पालघरच्या शार्दुल ठाकुरच्या पावलावर पाऊल ठेवत संघात स्थान म‌िळवेल, अशी आशा पालघरवासीय व्यक्त करत आहेत.

सचिनकडून म‌िळाले मार्गदर्शन

डिसेंबर २०१४मध्ये वरळी क्रिकेट क्लबच्या वतीने दक्षिण आफ्रिकेत झालेल्या एकदिवसीय स्पर्धेसाठी तन्वीशची सचिन तेंडुलकरचा मुलगा अर्जुन याच्या नेतृत्वाखाली खेळणाऱ्या टीममध्ये उपकर्णधार म्हणून निवड झाली होती. यादौऱ्यामध्ये तन्वीश अर्जुनचा रूम पार्टनरही होता. या काळात दोघांची चांगली मैत्री झाली. त्यावेळी तन्वीरला सच‌िन तेंडुलकरकडून मोलाचे मार्गदर्शन म‌िळाले. या दौऱ्यामध्ये सहापैकी पाच सामने ज‌िंकून देण्यात तन्वीशचा सिंहाचा वाटा होता. या स्पर्धेत त्याने ३२ ओव्हर टाकून ४२ धावा देत १६ बळी घेतले होते. तन्वीशला या खेळीसाठी ‘मॅन ऑफ दि मॅच’चा किताबही देण्यात आला होता.

दक्षिण आफ्रिकेचे ए. बी. मॉर्कल तन्वीशच्या खेळाने प्रभावित झाल्याने त्यांनी त्याला दक्षिण आफ्रिकेकडून क्रिकेट खेळण्याची ऑफर दिली. मात्र तन्वीशने ‘मला भारताकडूनच खेळायचे आहे,’ असे सांगत ती ऑफर नम्रपणे नाकारली.