ठाण्यात दुचाकी पेटली; वृद्ध महिला भाजली!

ठाणे:

महाराष्ट्र टाइम्स.कॉम

रस्त्यालगत पार्क केलेल्या दुचाकीला अचानक लागलेली आग विझवताना एक वृद्ध महिला भाजल्याची घटना रविवारी दुपारी ठाण्यातील तीनहात नाका परिसरात घडली. महिलेला उपचारासाठी खासगी रुग्णालयात दाखल करण्यात आले आहे.

तीनहात नाका येथील वाहतूक शाखेच्या कार्यालयापासून काही अंतरावर रस्त्यालगत दुचाकी पार्क केली होती. दुपारी अचानक दुचाकीला लाग लागली. अलिमा शेख (वय ८०) यांनी आग विझविण्यासाठी धाव घेतली. यात त्यांना हात भाजला. आगीची माहिती मिळाल्यानंतर अग्निशमन दल तसेच पालिकेच्या प्रादेशिक आपत्ती व्यवस्थापन कक्षाचे पथक घटनास्थळी दाखल झाले. त्यांनी आगीवर नियंत्रण मिळवले. आगीत दुचाकी खाक झाली आहे. साहिल शेख यांची ही दुचाकी असल्याची माहिती अधिकाऱ्यांनी दिली.