२८ ऑगस्टला ठाणेकरांची ‘स्वच्छ’ धाव

आरोग्याचा संदेश देत २७व्या महापौर वर्षा मॅरेथॉनचे आयोजन

म. टा. वृत्तसेवा, ठाणे

‘परिसर स्वच्छ ठेवूया... आरोग्यासाठी धावूया’ म्हणत यंदा २७व्या महापौर वर्षा मॅरेथॉनमध्ये तब्बल सात लाखांची बक्षिसे, पहिल्यांदाच १० किमीपर्यंत वाढवण्यात आलेली स्पर्धा, २ किमीचा 'वॉक फॉर फन', स्पर्धेमध्ये करण्यात येणारा टाइम टेक्नॉलॉजीचा वापर, ज्येष्ठ नागरिक गटातही यंदाची स्पर्धा रंगणार आहे. यंदा साधारणतः ३५ हजार स्पर्धक सहभागी होतील, असा अंदाज आहे.

ठाण्याचे महापौर संजय मोरे यांनी रविवारी एका पत्रकार परिषदेत या मॅरेथॉनची सविस्तर माहिती दिली. यंदाची स्पर्धा २८ ऑगस्टला होणार असून सकाळी ६.३० वाजता महापालिका चौकातून स्पर्धेला सुरुवात होणार आहे. गेली २६ वर्षे ठाणे महापौर वर्षा मॅरेथॉन असंख्य राज्य, राष्ट्रीय आणि आंतरराष्ट्रीय धावपटूंचे आकर्षण ठरली आहे. या मॅरेथॉनमध्ये टाइम टेक्नॉलॉजीचा वापर करण्यात येणार असून, २१ किमी पुरुष गट आणि १५ किमी महिला व पुरुष १० मिमी गट या तीन मुख्य स्पर्धेतील धावपटूंना 'टाइम चीप' देण्यात येणार असल्याने असंख्य राष्ट्रीय व आंतरराष्ट्रीय धावपटू भाग घेणार असल्याची माहिती संजय मोरे यांनी दिली. त्याचप्रमाणे यावर्षी पहिल्यांदाच विशेष २ किमी ‘वॉक फॉर फन’ या स्पर्धेचे आयोजन महापौर व महापालिका आयुक्त यांच्या सूचनेनुसार करण्यात आले आहे.

मॅरेथॉन स्पर्धेत सहभागी होणाऱ्या स्पर्धकांसाठी ठाणे परिवहन सेवेतर्फे मोफत बस सेवेची सुविधा उपलब्ध करून दिली जाणार आहे. शिवाय स्पर्धेचा प्रवेश ऑनलाइन आणि ऑफलाइन आहे. शिवसेना पक्षप्रमुख उध्दव ठाकरे स्पर्धेच्या पारितोषिक वितरणासाठी विशेष उपस्थित राहणार असल्याचे त्यांनी सांगितले. राज्याचे सार्वजनिक बांधकाम (सार्वजनिक उपक्रम) मंत्री व जिल्ह्याचे पालकमंत्री एकनाथ शिंदे यांच्या हस्ते या स्पर्धेला सुरुवात होणार आहे.

ज्येष्ठांसाठी वेगळा गट

ठाणे जिल्हयासाठी मर्यादीत ज्येष्ठ नागरिक 60 वर्षावरील महिला व पुरुषांसाठी गेल्या वर्षी पासून वेगळा गट ठेवण्यात आला असून या गटातील पहिल्या पाच विजेत्यांसाठी रोख बक्षीसे आणि मानचिन्ह देण्यात येणार आहेत. ज्येष्ठ नागरिकांसाठीची स्पर्धा ही महापालिका भवन ते बाटा शोरुम (नितीन कंपनी) अर्धा कि.मी. अशी ठेवण्यात आली आहे.