अ‍ॅपशहर

ठाणे पालिकेची खातीही राष्ट्रीयकृत बँकांत

ठाणे महापालिकेची खासगी बँकांमधील सर्व खाती राष्ट्रीयकृत बँकांमध्ये वळवण्याचे आदेश ठाण्याचे महापौर नरेश म्हस्के यांनी गुरुवारी प्रशासनाला दिले. नियमाप्रमाणे ही खाती राष्ट्रीयकृत बँकांमध्ये असण्याची गरज असल्याने तसे आदेश दिल्याचा दावा महापौर म्हस्के यांनी केला आहे.

Maharashtra Times 27 Dec 2019, 6:00 am
म. टा. प्रतिनिधी, ठाणे: ठाणे महापालिकेची खासगी बँकांमधील सर्व खाती राष्ट्रीयकृत बँकांमध्ये वळवण्याचे आदेश ठाण्याचे महापौर नरेश म्हस्के यांनी गुरुवारी प्रशासनाला दिले. नियमाप्रमाणे ही खाती राष्ट्रीयकृत बँकांमध्ये असण्याची गरज असल्याने तसे आदेश दिल्याचा दावा महापौर म्हस्के यांनी केला आहे. परंतु, माजी मुख्यमंत्री देवेंद्र फडणवीस यांच्या पत्नी अमृता फडणवीस यांनी ट्विटरवरून शिवसेनेवर केलेल्या टीकेमुळे खासगी बँकांतील खाती वळवण्यासाठी ही खेळी केली असल्याची चर्चा सध्या सुरू आहे.
महाराष्ट्र टाइम्स.कॉम tmc


भाजप आणि शिवसेनेची युती तुटल्यानंतर दोन्ही पक्षांमध्ये शीतयुद्ध रंगले असून, शह-काटशह देण्याचे प्रयत्न सुरू आहेत. अमृता फडणवीस यांनी शिवसेनेवर टीका करण्याची एकही संधी सोडली नसून, ट्विटरच्या माध्यमातून टीकास्त्रे सोडली जात आहेत. या पार्श्वभूमीवर राज्य शासनाकडून पोलिसांची अॅक्सिस बँकेतील खाती राष्ट्रीयकृत बँकेत वळवण्याच्या हालचाली सुरू झाल्या आहेत. त्याच पार्श्वभूमीवर ठाण्यातील शिवसेनेच्या महापौरांनी महापालिकेची सर्व खाती राष्ट्रीयकृत बँकांमध्ये वळवण्याचे आदेश प्रशासनाला दिले आहेत. ठाणे पालिकेच्या प्रशासनाकडून या संदर्भात अधिकृत प्रतिक्रिया देण्यात आली नसली तरीही आपण असे आदेश दिल्याचे महापौर नरेश म्हस्के यांनी 'मटा'शी बोलताना सांगितले.

ठाणे पालिकेची किती खाती खासगी बँकांमध्ये आहेत? या बँकांमध्ये किती गुंतवणूक करण्यात आली आहे? याविषयी बोलण्यास प्रशासनाकडून नकार देण्यात आला. शिवाय, खासगी बँकांमध्ये प्रशासनाकडून गुंतवणूक केली जात नसल्याचेही वरिष्ठ अधिकाऱ्यांकडून सांगण्यात आले. दरम्यान, महापौरच्या आदेशाविषयी बोलण्यासही प्रशासनाकडून नकार देण्यात आला.

प्रशासनाची सर्व खाती राष्ट्रीयकृत बँकांमध्ये असणे नियमास धरून आहे. त्यामुळे सर्व खाती राष्ट्रीयकृत बँकांमध्ये वळवण्याचे आदेश प्रशासनाला देण्यात आले आहेत. त्यानुसार प्रशासन त्यावर कार्यवाही करेल.

- नरेश म्हस्के, महापौर, ठाणे महापालिका

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज