​ आरोग्यासाठी पोलिसांची धाव…

मुख्यमंत्रीपत्नी, सेलिब्रेटींच्या उपस्थितीत पोलिस मॅरेथॉन उत्साहात

म. टा. वृत्तसेवा, ठाणे

कायम आरोपींच्या पाठीमागे धावणाऱ्या पोलिसांना कामाच्या व्यापातून कुटुंबीयांसोबत अधिक वेळ घालवता येत नाही. सुट्टीच्या दिवशीही काही ना काही काम असतेच आणि संपूर्ण सुट्टीवर विरजण पडते. मात्र, चांगले आरोग्य आणि फिटनेससाठी पोलिस कर्मचाऱ्यांना कुटुंबीयासोबत धावण्याचा योग रविवारी ठाण्यात झालेल्या पोलिस मॅरेथॉनमध्ये आला. पोलिसांचा उत्साह द्विगुणित करण्यासाठी सेलिब्रेटींनी हजेरी लावली होती. हिंदी आणि मराठी गाण्यांच्या तालावर पोलिस अधिकारी आणि कर्मचारी यांनी ठेका धरत एकच जल्लोष केला.

मागील वर्षीप्रमाणे यंदाही पोलिस कमिशनर मॅरेथॉनचे आयोजन करण्यात आले होते. पोखरण रोड नंबर १ वरील रेमण्ड कंपनीच्या मैदानातून पोलिस सहआयुक्त मधुकर पाण्डेय आणि अपर पोलिस आयुक्त मकरंद रानडे यांनी पहाटे झेंडा दाखवल्यानंतर २१ किमीच्या स्पर्धेला सुरुवात झाली. एरवी खाकी वर्दीत असलेले पोलिस टी-शर्टमध्ये होते. शिवाय गुलाबी थंडीने वातावरण अधिकच आल्हादायक झाले होते. वेगवेगळ्या वयोगटांत झालेल्या या मॅरेथॉनमध्ये मोठ्या उत्साहात पोलिस अधिकारी, कर्मचारी आणि कुटुंबीय तसेच महिला पोलिस कर्मचारी मॅरेथॉनमध्ये सहभागी झाले होते. धावपटूंचे मनोरंजन करण्यासाठी गाण्यांचे कार्यक्रमही आयोजित केले होते. दिवस उजाडताच पोलिस कर्मचाऱ्यांची संख्या वाढू लागली आणि कर्मचाऱ्यांचा उत्साह वाढवण्यासाठी अभिनेते सुनील शेट्टी, हृतिक रोशन यांच्यासह अभिनेत्री दिया मिर्झा, जॅकलिन फर्नांडिस यांनीही हजेरी लावली होती.

मुख्यमंत्री देवेंद्र फडणवीस यांच्या पत्नी अमृता फडणवीस यांनीही उपस्थित राहत पोलिसांना शुभेच्छा दिल्या. यावेळी पोलिस आयुक्त परमबीर सिंह यांच्यासह अन्य पोलिस अधिकाऱ्यांचे पाय गाण्यावर थिरकले होते. स्टेजसमोर जमलेल्या पोलिस कर्मचाऱ्यांनीदेखील जोरदार जल्लोष केला. माजी पोलिस आयुक्त के. पी. रघुवंशी यांनीही हजेरी लावली होती. विजेत्या धावपटूंना बक्षीस देऊन सन्मानित करण्यात आले.

विजेते स्पर्धक

२१ किमी (१४ ते ५० वर्ष वयोगट)

पुरुष: काशिनाथ दुधाडे (प्रथम), योगेश डहाळे (द्वितीय), अक्षय गोसावी (तृतीय)

महिला : शोभा देसाई (प्रथम), गीता राठोड (द्वितीय), सारिका मोडाद (तृतीय)

हौशी धावपटू

पुरुष : दशरथ मेंगाळ (प्रथम), विनोद बिंद(द्वितीय), प्रकाश गोदादे (तृतीय)

महिला : स्नेहल कारनाळे (प्रथम)

१० किमी

पुरुष : विजय कुराडे (प्रथम), शंकर रणदिवे (द्वितीय), अमित पवार (तृतीय)

महिला : संजना लहानगे (प्रथम), उर्मिला पवार (द्वितीय), छाया सोनाळे (तृतीय)

५ किमी

(५० वर्षांवरील)

पुरुष : वाल्मिकी पाटील (प्रथम), सुरेश चव्हाणके (द्वितीय), विजय हिरवे (तृतीय)

महिला : पूर्णिमा नवीन (प्रथम), दीपाली पाटील (द्वितीय), कल्पना मुगले (तृतीय)

१४ वर्षे

मुले : धीरज तायडे (प्रथम), समर्थ गणेशकर (द्वितीय), ओंकार आव्हाड (तृतीय)

मुली : गायत्री शिंदे (प्रथम), संस्कृती देसाई (द्वितीय), सिद्धी राऊत (तृतीय)

१४ ते ५० वर्षे वयोगट

पुरुष : मोहन भिरे (प्रथम), मधुकर पाटील (द्वितीय), दिनकर देसाई (तृतीय)

महिला : ऐश्वर्या बनसोडे (प्रथम), पूनम जाधव (द्वितीय), शहनाज मुजावर (तृतीय)