ठाणे, वाशीत ऑनलाइन ‘वीज’

३२ टक्के लोकांचे इंटरनेटच्या मदतीने बिल भरण्यासाठी प्राधान्य

म. टा. वृत्तसेवा, ठाणे

वीजबिल भरण्यासाठी तासनतास रांगेत उभे रहा, त्यासाठी ऑफिसमधून वेळ काढा, मुदतीत वीजबिल न भरल्यास दंड हे सर्व टाळण्यासाठी ठाणेकरांनी ऑनलाइन वीजबिल भरण्यास पसंती दिली असून भांडुप झोनमध्ये ठाणे व वाशी सर्कल ऑनलाइन वीजबिल भरण्यात आघाडीवर असल्याचे आकडेवारीवरून पुढे आले आहे. वाशी सर्कल ३५.९४ टक्के तर ठाणे सर्कलमधील ३१.९४ टक्के ग्राहक ऑनलाइन वीजबिल भरत आहेत. कोकण विभागातील भांडुप झोनमधील २५.६ टक्के तर कल्याण झोनमधील सर्वाधिक म्हणजे २९.६५ टक्के ग्राहक ऑनलाइन वीजबिल भरतात.

कोकण विभागामध्ये भांडुप आणि कल्याण झोन येत असून भांडुप झोनमध्ये भिवंडी सर्कल, पेण सर्कल, ठाणे आणि वाशी सर्कलचा समावेश आहे. तर कल्याण झोनमध्ये कल्याण सर्कल १, कल्याण सर्कल २ , पालघर सर्कल, वसई सर्कलचा समावेश आहे. भांडुप झोनमध्ये सर्वाधिक ऑनलाइन वीज बिल भरण्यात ठाणे सर्कल आघाडीवर आहे. ठाणे सर्कलमधील एकूण ग्राहक ९ लाख ६६ हजार ४५५ आहेत. त्यापैकी ३ लाख ०६ हजार ७९८ ग्राहकांनी ऑनलाइन वीज बिल भरले आहे. तर या बिलाचे ३८ कोटी ४४ लाख रुपयांचा भरणा करण्यात आला आहे. तर कोकण विभागात कल्याण झोन आघाडीवर असून २९ टक्के लोक ऑनलाइन वीजबिल भरण्यासाठी प्राधान्य देत आहेत. महावितरणच्या वेबसाइट किंवा मोबाइल अॅपवरून वीजबिल भरण्यासाठी ग्राहकांची पसंती वाढलेली दिसून येत आहे. यासाठी महावितरणकडून ऑनलाइन वीजबिल भरणाऱ्यांना ०.२५ टक्के सवलत दिली जात आहे.

कोकण विभाग अव्वल

राज्यात चार विभागाअंतर्गत महावितरणचे कामकाज चालत असून यामध्ये औरंगाबाद, कोकण, नागपूर आणि पुणे विभागाचा समावेश आहे. या विभागांतर्गत जिल्ह्यांचे झोन आहेत. राज्यात ऑनलाइन वीजबिल भरण्यात कोकण विभाग आघाडीवर असल्याचे आकडेवारीवरून स्पष्ट होत आहे. कोकण विभाग २३.७७ टक्के ग्राहक ऑनलाइन वीजबिलासाठी पसंती देत आहेत. तर त्यानंतर पुणे विभाग २२.४७, नागपूर विभाग १४.११ आणि औरंगाबाद १३.५७ टक्के ग्राहक ऑनलाइन वीजबिल भरत आहेत.

वीजबिल व ग्राहक

(रक्कम कोटीमध्ये)

झोन सर्कल ऑनलाइन ग्राहक ऑनलाइन भरणा ग्राहक टक्केवारी

भांडूप झोन भिवंडी सर्कल - - -

पेण सर्कल ८३,६७७ २३.५ १४.६९

ठाणे सर्कल ३,०६,७९८ ३८.४४ ३१.७४

वाशी सर्कल ३,१५,५८२ ४३.८६ ३५.९४

एकूण ७,०६,०५७ ३९.०७ २५.०६

ग्राहकांचा वेळ आणि पैसा वाचविण्यासाठी महावितरणने वेबसाइटद्वारे अथवा मोबाइल अॅपद्वारे ऑनलाइन वीजबिल भरणा करण्याची सुविधा दिली आहे. ग्राहकांनी अधिकाधिक ऑनलाइन वीजबिलासाठी प्राधान्य द्यावे. यासाठी वीजबिलामध्ये सवलतही देण्यात येते.

पुष्पा चव्हाण, मुख्य अभियंता, भांडुप नागरी परिमंडळ