म. टा. प्रतिनिधी, ठाणे
जर्मनीत रंगलेल्या आंतरराष्ट्रीय नेमबाजी स्पर्धेत ठाण्याच्या रुद्रांक्ष पाटील या खेळाडूने रौप्य पदकावर नाव कोरले आहे. २१ वर्षांखालील गटात देशाचे प्रतिनिधित्व करताना त्याने हे यश मिळविले. वैयक्तिक पारितोषिकासह त्याच्या गटाला सुवर्णपदकाने सन्मानित करण्यात आले. तब्बल २०० देशांमधून आलेल्या खेळाडूंचा या स्पर्धेत समावेश होता.
नेमबाजीचे प्रशिक्षण घेणाऱ्या रुद्रांक्षने मागील चार वर्षांपासून या स्पर्धेसाठी मेहनत घेतली होती. २१ वर्षांखालील नेमबाजी करणाऱ्या खेळाडूंच्या गटासाठी त्याने ही लढत दिली असून जगभरातून आलेल्या खेळाडूंमध्ये त्याने द्वितीय स्थान पटकाविले. १० मीटर एअर रायफल ज्युनिअर (पुरुष) या गटात त्याने हे यश मिळविले आहे. जर्मनी येथील हॅनवोव्हर येथे ही स्पर्धा पार पडली. त्याला भारताला वैयक्तिक गटात रौप्य पदकासह सांघिक गटात सुवर्ण पदक मिळविण्यात यश आले. १५ वर्षीय रुद्रांक्षाने २१ वर्षांवरील तसेच २१ वर्षांखालील गटातही कामगिरी बजावली. यापूर्वी तो सलग चार वर्षे राष्ट्रीय नेमबाजीत पदकांचा मानकरी ठरला होता. त्याचप्रमाणे 'खेलो इंडिया' स्पर्धेसाठीही सलग दोन वर्षे त्याची निवड झाली होती. यापूर्वी झेक रिपब्लिक येथील पिल्सन येथे झालेल्या ५०व्या ग्रँड प्रिक्स लिबरेशन आंतरराष्ट्रीय नेमबाजी स्पर्धेतही तो रौप्य पदकाचा मानकरी ठरला असून सांघिक गटातही त्याने सुवर्णपदक मिळविले होते.
विलेपार्ले येथील प्रबोधनकार ठाकरे क्रीडा संकुल येथे तो सराव करत असून स्नेहल पापलकर आणि जितेश कदम या प्रशिक्षकांना तो त्याच्या यशाचे श्रेय देतो. ठाण्यातील हिरानंदानी फाऊंडेशन स्कूलमध्ये तो नववीत शिकत असून खेळासंदर्भात शाळेने वारंवार दिलेल्या प्रोत्साहन, सराव यामुळे देशविदेशातील स्पर्धांमध्ये सहभाग शक्य असल्याचेही त्याने सांगितले आहे.