म. टा. वृत्तसेवा, पालघर
पालघर जिल्ह्यातील जव्हार तालुक्यात वाळवंडा गावच्या खडकीपाड्यातील कल्पेश जाधव मोठे यश मिळवत एमपीएससी परीक्षा पहिल्याच प्रयत्नात उत्तीर्ण झाला आहे. या खडकीपाड्यात रस्त्याची सोय नसून, एसटी बसही जात नाही. कल्पेश आदिवासी परिवारातील आहे. त्याने एमपीएससी परीक्षा उत्तीर्ण केल्यावर 'आमचा मुलगा साहेब झाला' अशा शब्दांत त्याच्या आईवडीलांनी प्रतिक्रिया व्यक्त केली.
या पाड्यात जाण्यासाठी एका ओहळातून तयार झालेली कच्च्या रस्त्याची पायवाट आहे. आदिवासी पाड्यात राहून शेती करणारे कल्पेशचे निरक्षर आई-वडील तर डोंगरउतारावरील जेमतेम दीड एकर शेतीच्या साह्याने उपजिविका करतात. अशा परिस्थितीतून दुर्दम्य इच्छाशक्तीच्या जोरावर कल्पेश चंदर जाधवने पहिल्याच प्रयत्नात राज्य लोकसेवा आयोगाच्या परीक्षेत यश संपादन केले. इतकेच नव्हे, तर यंदा राज्य लोकसेवा परीक्षेत कल्पेश जाधव हा उत्तीर्ण उमेदवारांमधील तो सर्वात कमी वयाचा उमेदवार ठरला आहे. आता तो राज्य शासनाच्या कौशल्यविकास विभागात उपसंचालक म्हणून रुजू होणार आहे. त्याच्या या यशामुळे आईवडिलांना तर आनंद झालाच; गावकऱ्यांनादेखील मोठा आंनद झाला आहे.
कल्पेशची घरची परिस्थिती तशी अगदी बेताचीच आहे. आई-वडील निरक्षर असून, मोलमजुरी करून संसार चालवतात. त्यांचा दुसरा मुलगा म्हणजेच कल्पेशचा मोठा भाऊ पोलीस कॉन्स्टेबल असून नोकरीला लागून जेमतेम तीन वर्षे झाली आहेत. कल्पेश जाधवचे शिक्षण वाळवंडा गावातील खडकीपाडा येथे इयत्ता चौथीपर्यंत जिल्हा परिषद शाळेत झाले. प्राथमिक शिक्षण वाळवंडा येथे झाले. माध्यमिक शिक्षण कावळे आदिवासी आश्रम शाळेत झाले असून, बारावीपर्यंतचे शिक्षण बोर्डीच्या कनिष्ठ महाविद्यालयातून विज्ञान शाखेतून झाले आहे.
कल्पेशने आपले पुढील पदवीचे शिक्षण कल्याणच्या आदिवासी वसतिगृहात राहून कल्याणच्या बिर्ला महाविद्यालयातून गणित विषय घेवून पूर्ण केले आहे. पदवीच्या दुसऱ्या वर्षाला शिक्षण घेत असताना एमपीएससी स्पर्धा परीक्षांची त्याने कास धरली आणि कोणत्याही शिकवणीशिवाय केवळ यूट्यूबवरील व्हिडिओ पाहून पूर्वपरीक्षेची तयारी केली. तसेच विविध वृत्तपत्रे वाचून स्पर्धा परीक्षा देवून पहिल्याच वर्षात यश मिळवले आहे.
० साहेब होईन तेव्हाच बूट घालेन!
कल्पेशच्या आईवडिलांच्या म्हण्यानुसार तो जेव्हा घरी यायचा तेव्हा म्हणायचा की, मी जेव्हा साहेब होईन तेव्हाच बूट घालेन! कल्पेश आता साहेब झाला असून त्याच्या पायात कोणत्या दिवशी तो बुट घालणार आहे, याची उत्सुकता त्याच्या पालकांना लागून राहिली आहे. तसेच त्याच्या घरची परिस्थीती अगदी बेताचीच आहे. साधे मातीचे घर, गावात रस्ता नाही, त्याच्या राहत्या घरी व्यवस्थित विजेची सोय नाही, घरच्या गरिबीमुळे कल्पेशला कोणतेही क्लास लावणे किंवा काेणाचे मार्गदर्शन घेणे शक्य नव्हते. मात्र कल्पेश म्हणायचा की, आई मी साहेबच होणार.
० साहेब झाला एवढेच कळले
आम्ही अडाणी, आम्हाला काय माहिती तो काय झाला. परंतु तो साहेब झाला? हे समजले आहे, अशा शब्दांत कल्पेशच्या पालकांनी प्रतिक्रिया दिली आहे. एमपीएससी म्हणजे काय हे आईवडिलांना माहीतच नाही. परीक्षा उत्तीर्ण झाल्याचे सकाळी सांगितल्यावरही त्यांना काही कळले नाही. अखेर सोप्या शब्दांत त्यांना 'मी साहेब झालो' एवढेच सांगितल्यावर ते आनंदित झाले. त्यानंतर ते मजुरीच्या कामाला निघूनही गेले, असे कल्पेशने सांगितले. तेव्हा ते गावभर सांगत होते की आमचा मुलगा साहेब झाला म्हणून. मात्र या अशिक्षित आई वडिलांना आजही माहिती नाही की आमचा मुलगा अधिकारी झाला म्हणजे नेमके काय झाले हे अजूनही त्यांना समजलेले नाही.
माझी अधिकारीपदासाठी निवड झाल्याचा विशेष आनंद आहे. त्याशिवाय सर्वात कमी वयाचा अधिकारी होणे ही अधिक आनंदाची घटना आहे. आता प्रशासकीय सेवा करताना उत्तम काम करण्याला प्राधान्य देणार आहे.
- कल्पेश जाधव