रेल्वे प्रशासनाकडून जून २०१९ पर्यंत आणखी एक मजला
म. टा. प्रतिनिधी, ठाणे
ठाणे रेल्वे स्थानकात येणाऱ्या दुचाकीस्वारांच्या पार्किंगसाठी बांधण्यात येणारा बहुमजली पार्किंग प्लाझा तळमजल्याचे काम पूर्ण झाल्यानंतर गुंडाळण्यात आला होता. परंतु या पार्किंग प्लाझावर आणखी एक मजला उभारण्याचा निर्णय घेण्यात आला आहे. त्यासाठी ४.९१ कोटी रुपयांचा खर्च येणार असून या बांधकामास नोव्हेंबर २०१८ मध्ये मंजुरी देण्यात आल्याचे रेल्वे मंत्रालयाकडून स्पष्ट करण्यात आले आहे. २०१५पासून अपूर्ण अवस्थेत असलेल्या आणि त्यानंतर त्याच स्थितीमध्ये पार्किंगसाठी सुरू करण्यात आलेल्या या पार्किंग प्लाझाचे पुढील काम सुरू होऊ शकणार आहे. या भागात हजारो दुचाकी वाहने दाखल होत असली तरी त्यांना पार्किंगसाठी जागा नसल्यामुळे स्थानकाला विळखा घालून पार्क गेली जातात. या कामामुळे येथील पार्किंग कोंडी सुटण्यास मदत होऊ शकणार आहे.
ठाणे स्थानक परिसरातून सुमारे सात लाखांहून अधिक प्रवासी प्रवास करत असून मुंबई, नवी मुंबईसह राज्य आणि देशांतर्गत प्रवाशांसाठी महत्त्वाचे स्थानक आहे. मुंबई उपनगरीय रेल्वे स्थानकांमधील अत्यंत गर्दीचे स्थानक असलेल्या ठाणे स्थानक परिसरात येणाऱ्या वाहनांच्या पार्किंगसाठी कोणतीही व्यवस्था उपलब्ध नव्हती. मोकळ्या जागेत रेल्वेकडून तात्पुरती व्यवस्था केली जात होती. मात्र तीही अपुरी ठरत होती. या समस्येवर तोडगा काढण्यासाठी ठाणे स्थानकाबाहेर बहुमजली वाहनतळ उभारण्यास रेल्वे प्रशासनाने मंजुरी दिली. जून २०१५ रोजी केंद्रीय रेल्वे मंत्री सुरेश प्रभू यांनी दादर स्थानकातून रिमोट कंट्रोलच्या साहाय्याने ठाण्याच्या वाहनतळाचे भूमिपूजन केले. तेव्हापासून या वाहनतळाचे काम धीम्यागतीने सुरू होते. डिसेंबर २०१५ रोजी अनेक अडथळे पार करत या इमारतीच्या कामाला सुरुवात झाली. त्यानंतर वर्षभरात हे काम पूर्ण होईल अशी नागरिकांची अपेक्षा होती. मात्र वर्ष उलटले तरी केवळ इमारतीच्या तळाचे काम सुरू होते. त्यानंतर अवघ्या काही दिवसांमध्ये हे काम बंद करण्यात आले होते. परंतु त्याही स्थितीत २०१७ पासून या तळमजल्यावर वाहनांना पार्किंग उपलब्ध करून दिली जात होती. रेल्वेकडून या पार्किंग प्लाझाचा आणखी एक मजला उभारण्याचा निर्णय घेतला आहे. त्यासाठी लागणारा निधी ४.९१ कोटी सुपूर्द करण्यात आल्याचे रेल्वे मंत्रालयाकडून स्पष्ट करण्यात आले आहे.
निधीअभावी काम थांबले…
ठाण्याचे खासदार राजन विचारे यांनी ठाणे स्टेशन बाहेरील पार्किंग प्लाझाच्या थांबलेल्या कामा विषयी रेल्वेमंत्र्यांना प्रश्न विचारला होता. त्यावर रेल्वे राज्यमंत्री राजेन गोहाई यांनी याविषयीची माहिती उपलब्ध करून दिली. ठाणे स्थानकातील या प्रकल्पासाठी १२.७१ कोटींचा खर्च अपेक्षित होता. त्यापैकी १०.३४ कोटींच्या निधी मंजूर झाला. तळमजल्याचे काम पूर्ण झाले. नव्या सुधारणांच्या पार्श्वभूमीवर हे काम थांबवण्यात आल्याचे स्पष्ट झाले होते.