मद्यधुंद तरुणांची पोलिसांना मारहाण

म. टा. वृत्तसेवा, भार्इंदर

भल्या पहाटे एका फ्लॅटमध्ये मोठ्या आवाजात सुरू असलेला धिंगाणा थांबविण्यासाठी गेलेल्या तीन पोलिसांना डांबून ठेवून त्यांना मारहाण झाल्याचा प्रकार मंगळवारी मीरारोडमध्ये घडला. याप्रकरणी मीरारोड पोलिसांनी १४ जणांना अटक केली असून त्यात दोन महिलांचाही समोवश आहे, अशी माहिती पोलिस निरीक्षक वसंत लब्दे यांनी दिली.

मीरारोड पूनम गार्डन भागात समृद्धी नावाच्या इमारतीत डी ६०३ या फ्लॅटमध्ये सहाव्या मजल्यावर मोठ्या आवाजात गाणी वाजवून आरडाओरडा सुरू असल्याची तक्रार मंगळवारी पहाटे पाचच्या सुमारास ठाणे ग्रामीण पोलिसांच्या कंट्रोल रूममध्ये आली. पहाटे अडीच वाजल्यापासून जोरजोराने आवाज येत असल्याने या इमारतीमधील त्रस्त रहिवाशांनी ही तक्रार केली होती. तक्रार आल्यावर मीरारोड पोलिस ठाण्यातील दोन पोलिस या इमारतीत गेले. इमारतीच्या वॉचमनसह पोलिस कर्मचारी फ्लॅटमध्ये गेले व धिंगाणा बंद करण्यास सांगितले. त्यावेळी फ्लॅटमध्ये पार्टी करीत असलेल्यांनी या दोन पोलिसांना आतमध्ये कोंडत शिवीगाळ करीत मारहाण सुरू केली. या फ्लॅटमध्ये असलेले सगळे जण दारू प्यायले होते व हुक्का प्यायले होते. 'हा धिंगाणा बंद करा' असे पोलिसांनी सांगितले असता मद्यधुंद असलेल्या १४ जणांनी पोलिसांनाच मारहाण केली. एका पोलिसाचा मोबाइल काढून घेतला. दोनपैकी एका पोलिस कर्मचाऱ्याने मोबाइलवरून त्याला डांबून ठेवल्याची माहिती मिरारोड पोलिस ठाण्यात व पोलिस निरीक्षक लब्दे याना दिली तेव्हा तिसरा पोलिस कर्मचारी त्यांना सोडविण्यासाठी गेला असता तिसऱ्या कर्मचाऱ्यालाही मद्युधंद १४ जणांनी मारहाण केली. त्यामुळे अखेर मीरारोड व आजूबाजूच्या पोलिस ठाण्यातील जादा पोलिस बंदोबस्त या इमारतीत आला. त्यानंतर तीन पोलिसांची सुटका करण्यात आली. तसेच, त्या १४ जणांना पोलिसांनी ताब्यात घेतले.

चिराग त्रिवेदी याच्या वाढदिवसाची ही पार्टी होती व त्या पार्टीत आलेले सगळे दारू प्यायले होते. रात्री १२ वाजता सुरू झालेली पार्टी पहाटे पाच वाजेपर्यंत सुरू होती. १४ जणांना अटक करण्यात आली असून त्यांना दोन दिवसांची पोलिस कोठडी सुनावण्यात आली आहे. सर्व १४ आरोपी मीरारोड भागातील असून चांगल्या घरातील, काही जण नोकरी करणारे, काही जण व्यवसाय करणारे आहेत.