म. टा. वृतसेवा, पालघर
वाडा पंचायत समितीच्या सभापती व उपसभापती पदासाठी घेण्यात आलेल्या निवडणुकीत महाविकास आघाडीचा निर्विवाद विजय झाला आहे. सभापतीपदी शिवसेनेचे योगेश गवा तर उपसभापतीपदी राष्ट्रवादी काँग्रेसचे जगदीश पाटील यांची निवड करण्यात आली.
सभापतीपदाच्या निवडणुकीसाठी भाजपकडून सुवर्णा पडवले व उपसभापतीपदासाठी कृपाली पाटील यांनी उमेदवारी अर्ज दाखल केले होते. ऐनवेळी दोन्ही उमेदवारांनी आपले अर्ज मागे घेतल्याने योगेश गवा आणि जगदीश पाटील यांची बिनविरोध निवड झाली. गवा हे गालतरे तर जगदीश पाटील हे आबिटघर गणातून निवडून आले आहेत.
वाडा पंचायत समितीत शिवसेना ४, राष्ट्रवादी ४, भाजप २, मनसे व अपक्ष प्रत्येकी एक असे एकूण बारा संख्याबळ असून अपक्ष उमेदवार सागर ठाकरे यांनी महाविकास आघाडीला पाठिंबा दिला होता. त्यामुळे महाविकास आघाडीची सदस्यसंख्या ९ इतकी झाली. या निवडणुकीत विशेष सभेचे अध्यक्ष तथा पीठासीन अधिकारी म्हणून उपजिल्हाधिकारी अधिकारी अर्चना कदम यांनी काम पाहिले.
नवनिर्वाचित सभापती व उपसभापती यांचे शिवसेनेचे जिल्हा प्रमुख प्रकाश पाटील, आमदार शांताराम मोरे, जिल्हा परिषदेचे गटनेते नरेश आकरे, उपजिल्हाप्रमुख सुनील पाटील, तालुकाप्रमुख उमेश पटारे, राष्ट्रवादीचे तालुका अध्यक्ष रोहिदास पाटील, ज्येष्ठ कार्यकर्ते निखिल पष्टे, अमिन सेंदु, काँग्रेसचे वाडा तालुका अध्यक्ष दिलीप पाटील, प्रा.धनंजय पष्टे, अरूण पाटील, अरूण अधिकारी, वाड्याच्या नगराध्यक्षा गीतांजली कोळेकर आदींनी अभिनंदन केले.