म. टा. वृत्तसेवा, ठाणे
सार्वजनिक ग्रंथालयाचे अनेक प्रश्न प्रलंबित आहेत, ते सोडविण्यासाठी सरकारकडे सातत्याने पाठपुरावा करूनही या प्रश्नाची दखल घेतली जात नसल्याने अखेर ठाणे जिल्हा ग्रंथालय संघाने आंदोलनाचे शस्त्र उगारले आहे. १९ सप्टेंबर रोजी, सकाळी ११ वाजता, जिल्हाधिकारी कार्यालयासमोर धरणे आंदोलन करण्याचा निर्णय राज्य ग्रंथालय संघाने घेतला आहे.
नवीन ग्रंथालयांना मान्यता मिळावी, सार्वजनिक ग्रंथालयांना दर्जा बदलावा, सेवक वेतन आराखड्यास मंजुरी मिळावी, अनुदानात वाढ करावी, या प्रमुख मागण्यांसह इतर मागण्यांसाठी जिल्हा ग्रंथालय कर्मचाऱ्यांच्या वतीने धरणे आंदोलन करत सरकारचे लक्ष वेधण्याचा प्रयत्न केला जाणार आहे.
गेल्या अनेक वर्षांपासून या प्रश्नांबाबत सरकारशी पत्रव्यवहार, चर्चा करूनही यावर कोणताच तोडगा निघत नसल्याने ग्रंथालय कर्मचाऱ्यांनी असंतोष व्यक्त करत आंदोलनाचा पवित्रा घेतला आहे. राज्य ग्रंथालय संघाच्या निर्णयानुसार ठाणे व पालघर जिल्ह्यातील सर्व सार्वजनिक सेवक, कर्मचारी व पदाधिकारी बुधवारी होणाऱ्या धरणे आंदोलनात सहभागी होणार आहेत.