अल्पवयीन मुलाची निर्घृण हत्या, एक जण ताब्यात

उल्हासनगर : उल्हासनगरातील आझाद नगर परिसरात एका १७ वर्षीय अल्पवयीन तरुणाची पूर्ववैमनस्यातून निर्घृण हत्या झाल्याची घटना समोर आली आहे. या प्रकरणी उल्हासनगर पोलिसांनी एका संशयिताला ताब्यात घेतले.

उल्हासनगर येथील कॅम्प नंबर एक परिसरातील आझाद नगर येथे सुंदरम नासीद हा तरुण आपल्या कुटुंबासह राहत होता. मात्र सुंदरम याचे महिन्यापूर्वी याच परिसरात राहणारा बिपीन यादव याच्यासोबत वाद झाला. या वादाचे प्रकरण पोलिस ठाण्यापर्यंत गेले होते. त्यामुळे यादव याने सुंदरम याच्याबाबत मनात राग ठेवला होता. या रागातून यादवने मंगळवारी रात्री ११ वाजण्याच्या सुमारास सुंदरम याच्या गळ्यावर चाकूने वार केले. या हल्ल्यात सुंदरमचा जागीच मृत्यू झाला. या प्रकरणी उल्हासनगर पोलिस ठाण्यात हत्येचा गुन्हा दाखल करण्यात आला असून, पोलिसांनी एका संशयिताला ताब्यात घेत चौकशी सुरू केली आहे. मात्र या हत्येतील मुख्य आरोपी बिपीन यादव हा फरार असून पोलिस त्याचा शोध घेत आहेत.