भीतीच्या सावटाखालीही सोशल मिडियावर विनोदाचे फव्वारे
म. टा. प्रतिनिधी, ठाणे
'वीस सेकंद साबणाने हात धुताना नळ बंद ठेवा नाहीतर पाणी संपेल आणि नुसते हात चोळत बसाल', 'मी आलोय तुमचा उन्हाळा', 'अडचणी तर महान लोकांच्या जीवनात येतात नाहीतर राम वनवासात, कृष्ण कारावासात आणि मी करोनाच्या दिवसात ऑफिसात कशाला गेलो असतो', 'सध्या पोरांना करोनाच्या सुट्ट्या लागल्यात... असे म्हणायला तो काय सण आहे का...' सध्या करोनाच्या निमित्ताने सगळीकडे गंभीर वातावरण निर्माण झाले आहे. परंतु सोशल मीडियावर अनेक विनोद आणि मिम्स काही काळ गंभीर वातावरणात हलकेफुलके करण्यात मदत होत आहे. घरातून काम करत असताना या विनोदी मिम्समुळे काही वेळाचा दिलासा मिळत आहे. विशेष म्हणजे अनेकजण या मिम्स बनवण्यामध्येच रममाण झाल्याप्रमाणे या विनोदाचा प्रादुर्भाव होतच आहे.
करोनामुळे राज्यभर भीतीचे सावट असताना त्यावरील विनोदी मेसेजनी सध्या सोशल मीडियावर धुमाकूळ घातला आहे. रामदास आठवले यांच्या 'गो करोना, करोना गो'च्या घोषणांच्या अनेक विनोदांची निर्मिती झाली आहे. 'को-कोणालाच, रो-रोजगार, ना-नाही...करोना सर्वजण घरी बसा...', 'गुरे, शेळ्यांनी रस्त्यातून जाताना शेताचे नुकसान करून नये म्हणून पूर्वी 'मुस्कं' घालून त्यांचे तोंड बंद केले जायचे आता तोंडाला मास्क घालून तोंड बंद केले जाते,' 'जैसे करोना... वैसे भरोना', चिकनपेक्षा, गुटख्यातून करोना पसरतो अशि अफवा पसरली असती तर निम्मा देश स्वच्छ झाला असता, अशा अनेक गंमतीशीर विनोदांनी सध्या धुमाकूळ घातला आहे. या विनोद बुद्धीने काहीसा विरंगुळा मिळत असला तरी यातील गांभीर्य मात्र सोडू नका, असा सल्लाही जाणकारांकडून मिळत आहे.