खासदार राजन विचारे बोलत असल्याचे सांगून ठगवले
म. टा. वृत्तसेवा, ठाणे
'मी आमदार प्रताप सरनाईक बोलतोय', असा फोन करून दोन भामट्यांनी डोनेशन उकळण्याचा प्रयत्न केल्याचा प्रकार काही महिन्यांपूर्वी ठाण्यात समोर आला होता. मात्र पुन्हा याच भामट्यांनी फसवणुकीसाठी हाच फंडा वापरला असून यावेळी मात्र आमदाराच्या नावाने नव्हे तर 'खासदार राजन विचारे' बोलत असल्याचे सांगून बालदिनानिमित्त अपंग मुलांना व्हीलचेअर वाटप करायचे आहे. त्यासाठी मिठाई विक्रेत्याकडे १२ हजार रुपयांची डोनेशनची मागणी करत फसवणुकीचा प्रयत्न केला असून कासारवडवली पोलिसांनी या दोन्ही भामट्यांना अटक केली आहे.
निखिल रावरिया यांचे घोडबंदर रोडवरील कावेसर येथे श्रीजी स्वीट्स नावाचे मिठाईचे दुकान आहे. मंगळवारी दुकानात काम करत असताना दुपारी एक वाजता निखिल यांना मोबाइलवर फोन आला. समोरची व्यक्ती मराठीतून संभाषण करत होता. आम्ही अपंग मुलांना व्हीलचेअरचे वाटप करणार आहेत. असे बोलून फोन बंद केला. या व्यक्तीने निखिल यांच्याकडून वडिलांचा मोबाइल नंबर घेतल्याने वडिलांनाही राजन विचारे या नावाने असाच फोन आला होता. या प्रकाराबाबत निखिल यांनी त्यांच्या ओळखीचे रॉनी मणेरा यांना सांगितली. मणेरा यांनी ज्या मोबाइल नंबरवरून निखिल यांना फोन आला त्या नंबरवर पुन्हा फोन केल्यानंतर तलावपाळी येथे आमदार प्रताप सरनाईक यांनी कार्यक्रम ठेवला असून येथेही ५० अपंग मुलांना सायकलीचे वाटप करण्यात येणार आहे. प्रत्येकाला एक सायकल दिली जाणार असून त्यासाठी निधी गोळा करत असल्याचे समोरचा व्यक्ती मणेरा यांना म्हणाला. त्यावेळी कितीची पावती लागेल असा प्रश्न मणेरा यांनी करताच समोरच्या व्यक्तीने 'मी खासदार आहे, मी काही शाखा प्रमुख नाही.' माझे कार्यकर्ते येतील असे सांगून या व्यक्तीने फोन बंद केला. परत मणेरा यांनी या व्यक्तीला फोन केल्यानंतर १२ हजार डोनेशनची मागणी त्याने केली.
या सर्व प्रकाराबाबत संशय आल्याने मणेरा यांनी खासदार राजन विचारे यांच्या चरईतील कार्यालयात जाऊन खात्री केली असता, खासदारांनी अपंग मुलांसाठी कोणताही कार्यक्रम आयोजित केला नसल्याची समोर आले. फसवणुकीचा हा प्रकार असल्याने निखिल यांनी दिलेल्या तक्रारीनंतर बुधवारी संबंधित फोन करणाऱ्या व्यक्तीविरोधात कासारवडवली पोलिस ठाण्यात फसवणुकीचा प्रयत्न केल्याचा गुन्हा दाखल झाल्यानंतर पोलिसांनी आरोपीचा शोध घेत सिद्धेश सावंत आणि राजेश मिश्रा या दोघांना गुरुवारी पहाटे गायमुख येथून अटक केल्याची माहिती वरिष्ठ पोलिस निरीक्षक डी. एस. ढोले यांनी दिली.
याच आरोपींनी फेब्रुवारी महिन्यात आमदार प्रताप सरनाईक बोलत असून ५१ हजार रुपये डोनेशनची मागणी व्यावसायिकाकडे केली होती. त्यावेळी पोलिसांनी आरोपींना अटक केली होती. त्यानंतरही आरोपींची भामटेगिरी सुरूच असल्याने आरोपींवर कडक कारवाई करण्याचा निर्णय पोलिसांनी घेतला आहे.
००००