म. टा. वृत्तसेवा, पालघर
पालघरच्या पोलिस अधीक्षक कार्यालयातल्या लेखा शाखेतील एक लिपिकाला सात हजार रुपयांची लाच स्वीकारताना लाच लुचपत प्रतिबंधक विभागाने अटक केली. एका पोलिसाचे थकीत बिल काढण्यासाठी त्याने ही लाच मागितली होती.
पालघर पोलिस अधीक्षक कार्यालयाअंतर्गत कार्यरत असलेल्या एका ५५ वर्षीय पोलिस कर्मचाऱ्याचा तीन महिन्यांनी पगार, घरभाडे व दुर्गम भागातील भत्ता थकबाकीची काही रक्कम पोलिस अधीक्षक कार्यालयातील लेखा शाखेकडे मंजुरीसाठी आली होती. त्या शाखेत कार्यरत असलेले लिपिक कैलास जेसा चव्हाण यांनी या पोलिस सहकाऱ्याकडे सात हजारांची मागणी केली. फिर्यादीने पालघर येथील लाचलुचपत प्रतिबंधक विभागाचे पोलिस उपअधीक्षक अजय आफळे यांची भेट घेऊन याबाबत तक्रार दाखल केली. त्या तक्रारीनुसार मंगळवारी ही लाच स्वीकारताना चव्हाणला अटक करण्यात आली.
दरम्यान, जिल्हा पोलिस अधीक्षकांच्या कार्यालयातच लाचे मागितली जात असल्याने जिल्ह्यातील गुन्हे रोखणार तरी कोण, असा प्रश्न पालघरकरांना पडला आहे.