म. टा. वृतसेवा, पालघर परदेशात तेथील भाषेतील शिक्षणाला प्राधान्य दिले जाते. आपल्या देशात मात्र इंग्रजी माध्यमाचा आग्रह धरून अतिरेक होत असल्याचे मत नोंदवून, मातृभाषेतून शिक्षण मोलाचे असल्याचे प्रतिपादन राज्य आदर्श शिक्षक पुरस्कारप्राप्त शिक्षक प्रमोद पाटील यांनी केले. दातीवरे शिक्षण संस्थेच्या दातीवरे इंग्लिश हायस्कूलमध्ये मंगळवार आयोजित विज्ञान, चित्र व हस्तकला तसेच ग्रंथ प्रदर्शनाचे उद्घाटन पाटील यांच्या हस्ते झाले. यावेळी प्रमुख पाहुणे म्हणून ते बोलत होते. नुकतेच इंडोनेशिया येथील आंतरराष्ट्रीय शैक्षणिक परिषदेला उपस्थित राहून तेथील शैक्षणपद्धती आत्मसात केली असता, तेथील शाळांमध्ये आरोग्यविषयक सोयी-सुविधा उपलब्ध असल्याचे त्यांनी नमूद केले. विद्यार्थ्यांच्या मनातील वैज्ञानिक जिज्ञासा वाढीस लागावी, त्यांच्या मनात विज्ञानविषयक कुतूहल निर्माण व्हावे, शाळेत शिकवल्या जाणाऱ्या वेगवेगळ्या वैज्ञानिक संकल्पना सहज स्पष्ट व्हावे यासाठी विज्ञान प्रदर्शन महत्त्वाची भूमिका पार पाडते असे सांगून प्रदर्शनात सहभागी विद्यार्थ्यांचे त्यांनी अभिनंदन केले. या विज्ञान व विविध कला प्रदर्शनात विद्यार्थ्यांनी इंधनाला पर्याय म्हणून विजेचा वापर करून बनविलेली बोट, पाण्याचा सदूपयोग, रेन वॉटर हार्वेस्टिंग आदी प्रकल्प होते, तर चित्रकला व रांगोळीच्या माध्यमातून 'मुलगी वाचवा' हा संदेश देण्यात आला. तसेच तंबाखूमुक्त शाळा हा उपक्रम राबवण्यात आला. यात विद्यार्थ्यांनी हिरिरीने भाग घेतला, तर शिक्षकांच्या शैक्षणिक साहित्यातून गणितीय गंमतीजमती विद्यार्थ्यांना आकर्षित करून घेत होत्या. या कार्यक्रमाचे अध्यक्ष दातीवरे शिक्षण संस्थेचे विद्यमान अध्यक्ष जगन्नाथ वर्तक होते. वर्तक यांनी विविध कला कौशल्यातून विद्यार्थ्यांच्या व्यक्तिमत्त्वाला वेगवेगळे पैलू पडत असून एक आदर्श व्यक्ती घडते. विद्यार्थ्यांना योग्य संधी उपलब्ध करून दिल्याने त्यांच्या ज्ञानाच्या कक्षा रूंदावतात असे सांगून शिक्षक व विद्यार्थ्यांचे कौतुक केले. यावेळी प्रमुख पाहुणे म्हणून शालेय शिक्षण समितीचे अध्यक्ष हेमंत ठाकूर, दातीवरे सरपंच ज्योती तामोरे, शाळेचे मुख्याध्यापक आत्माराम राठोड, शिक्षक, ग्रामपंचायत सदस्य, आजी-माजी विद्यार्थी आणि पालक मोठ्या संख्येने उपस्थित होते. या प्रदर्शनाचे प्रास्ताविक शाळेचे मुख्याध्यापक आत्माराम राठोड यांनी, तर सूत्रसंचालन विज्ञान शिक्षक सुशील ठाकूर यांनी केले.
'देशात इंग्रजी माध्यमाचा अतिआग्रह'
म टा वृतसेवा, पालघरपरदेशात तेथील भाषेतील शिक्षणाला प्राधान्य दिले जाते...
महाराष्ट्र टाइम्स.कॉम 19 Dec 2019, 4:00 am