महिलेला बसने चिरडले

वाडा : वाडा ते पीक या मार्गावर एका महिलेला एसटी बसने चिरडल्याने तिचा जागीच मृत्यू झाला. अरुंद रस्ता व एसटी चालकाच्या बेजबाबदारपणामुळे ही घटना घडल्याचे सांगण्यात येत आहे.

जव्हार येथून आपले काम आटोपून मलवाडामार्गे पीक या रस्त्याने सजन लहांगे पत्नीसह दुचाकीने उज्जैनी (भोकरपाडा) या आपल्या गावी जात होते. पीक गावाजवळ सायंकाळी पावणे पाच वाजण्याच्या सुमारास पाठीमागून भरधाव एसटी बस येत असल्याने बसला पुढे जाण्याचा इशारा देऊन सजन यांनी दुचाकीचा वेग कमी केला. आधीच अरुंद रस्ता, त्यात बसचालकाचा वेग, यामुळे अंदाज न आल्याने बसचा धक्का या दुचाकीला लागला. बसच्या मागील चाकाखाली चिरडून वंदना लहांगे (३२) यांचा जागीच मृत्यू झाला. सजन हे विरुद्ध दिशेला पडल्याने त्यांना दुखापत झाली नाही. दिगंबर ससाणे असे बस चालकाचे नाव असून तो वाडा पोलिस ठाण्यात हजर झाला आहे, अशी माहिती पोलिस उपनिरीक्षक दिलीप पवार यांनी दिली.