म. टा. प्रतिनिधी, ठाणे
उस्मानाबादवरून ठाण्यात आलेल्या एका युवकाने स्वतःवरच कोयत्याने वार करून घेतल्याचा खळबळजनक प्रकार गुरुवारी ठाणे रेल्वे स्थानक परिसरात घडला. दारूच्या नशेत असलेल्या या युवकाचा संपूर्ण प्रकार मोबाइलमध्ये कैद झाला असून पोलिसांनी तात्काळ धाव घेत त्याच्या हातातील कोयता काढून घेतल्याने पुढील अनर्थ टळला. सिव्हिल रुग्णालयात उपचार केल्यानंतर युवकाला नातेवाईकाच्या ताब्यात देण्यात आले आहे.
मूळचा उस्मानाबादचा असलेला भीमराव भिसे (२६) याची आत्या ठाण्यातील माजिवडा परिसरात राहत असून पाच दिवसांपूर्वी तो गावावरून आत्याच्या घरी आला होता. विवाहित असलेला भीमराव गुरुवारी सकाळी ठाणे रेल्वे स्थानक परिसरात आल्यानंतर मासळी विक्रेत्याच्या नकळत टोपलीतून कोयता घेतला आणि हातात कोयता घेऊन चालत जात असताना नागरिक घाबरले. काही अंतरावर पुढे गेल्यानंतर भीमरावने स्वतःच्या डोक्यावर कोयता मारून घेतला. त्यामुळे तो जखमी झाला. त्यामुळे नागरिकांची मोठी गर्दी जमली होती. पोलिसांना याबाबत माहिती मिळाल्यानंतर पोलिसांनी धाव घेत त्याच्या हातातील कोयता काढून घेतला. त्यानंतर तो रस्यावर डोके आपटून घेत होता. रक्तबंबाळ झालेल्या भीमरावला ताब्यात घेत पोलिसांनी सिव्हिल रुग्णालयात उपचारासाठी दाखल केले. मात्र हा प्रकार काही जणांनी मोबाइलमध्ये चित्रित केला असून सध्या ही क्लिप सोशल मीडियावर व्हायरल होऊ लागली आहे. पत्नीसोबत असलेल्या वादातून त्याने हा प्रकार केल्याची माहिती पुढे येऊ लागली आहे. या प्रकरणी ठाणेनगर पोलिस ठाण्यात नोंद करण्यात आली आहे. भीमराव याला दारूचे व्यसन असल्याची माहिती पोलिसांनी दिली. मात्र अर्ध्या तासापेक्षा अधिक वेळ चाललेल्या या प्रकारामुळे नागरिकांची एकच पळापळ झाली होती.