वीज बिल भरणा केंद्रात चोरी

कल्याण : पश्चिमेकडील पारनाका परिसरातील महावितरणच्या वीज बिल भरणा केंद्रामधून अज्ञात चोरट्याने ६४ हजारांची रोकड लंपास केल्याची घटना मंगळवारी सकाळी घडली.

वीज बिल भरणा केंद्राचा दरवाजा एका अज्ञात व्यक्तीने ठोठावत थेट केबिनमध्ये प्रवेश केला. त्यानंतर त्याने स्वतःजवळील पेपर एका टेबलावर ठेवून तेथील महिलेला या पेपरवर स्टँप मारण्यास सांगितले. तिची नजर चुकवून केंद्रात पेटीत जमा असलेली ६४ हजारांची रोकड लंपास केली. रोकड चोरीस गेल्याचे निदर्शनास आल्यानंतर महिलेने बाजारपेठ पोलिस ठाण्यात तक्रार नोंदवली. पोलिसांनी त्याच्याविरोधात गुन्हा दाखल केला आहे.