नगरसेवकाला धमकी

बदलापूर ः गेल्या काही दिवसांत उल्हासनगर, उपनगरात सुरेश पुजारीचे खंडणीसाठी धमकीसत्र सुरू आहे. बदलापुरातील राष्ट्रवादीचे नगरसेवक आशिष दामले यांनाही सुरेश पुजारीने खंडणीसाठी फोन केल्याचे समोर येते आहे. यापूर्वीही दामले यांना पुजारी टोळीकडून खंडणीसाठी फोनवरून धमकावण्यात आले होते. याप्रकरणी नुकताच बदलापूर पश्चिम पोलिस ठाण्यात गुन्हा दाखल करण्यात आला आहे.

उल्हासनगर तसेच नालासोपारा येथे खंडणीसाठी मद्याच्या दुकानावर गोळीबार केल्याची घटना ताजी असतानाच, सुरेश पुजारी टोळीने आपला मोर्चा पुन्हा बदलापूरकडे वळवला आहे. बदलापुरातील राष्ट्रवादी काँग्रेस पक्षाचे नगरसेवक आशिष दामले यांना ९ मे रोजी एका अज्ञात क्रमांकावरून फोन करत खंडणी मागण्यात आली. फोनवरून सुरेश पुजारी बोलत असल्याचे सांगण्यात आले. खंडणी न दिल्यास पुढे काय करायचे ते करेन, अशी धमकी दिल्याचे दामले यांनी पोलिस ठाण्याला दिलेल्या पत्रात म्हटले आहे.