म. टा. वृत्तसेवा, ठाणे
साइड दिली नाही म्हणून कारचालकाने टीएमटीचालकाला मारहाण केल्याची घटना रविवारी सकाळी नितीन कंपनी येथे घडली. या प्रकरणी कारचालकाविरुद्ध नौपाडा पोलिस ठाण्यात तक्रार दाखल करण्यात आली आहे.
चालक संजयकुमार आव्हाड (४३) हे रविवारी सकाळी बोरीवलीवरून ठाण्याला बस घेऊन येत होते. बसमध्ये प्रवासीदेखील होते. कॅडबरी येथे थांब्यावर प्रवासी सोडल्यानंतर बस मार्गस्थ झाली. मात्र जेसीबीला ओव्हरटेक करून टीएमटी बस पुढे जात असताना पाठीमागून जोरजोरात कारचालक हॉर्न वाजवत होता. जेसीबीमुळे टीएमटी बसला ओव्हरटेक करण्यास विलंब झाला. याचा राग आल्याने कारचालकाने नितीन कंपनी येथे टीएमटी बस अडवली. तसेच, साइड का दिली नाही म्हणून कारचालक बसमध्ये चढला आणि शिवीगाळ करत मारहाण केली, असा आरोप आव्हाड यांनी केला आहे.