१५०व्या प्रयोगाकडे यशस्वी घोडदौड.
म. टा. वृत्तसेवा, ठाणे
एकांकिकेचे व्यावसायिक नाटक होण्याची अनेक उदाहरणे मराठी व्यावसायिक रंगभूमीवर आहेत. 'अनन्या' या नाटकाने या यादीत आता मनाचे स्थान मिळवले आहे. प्रेक्षागृहातून उस्फूर्त होणारा टाळ्यांचा कडकडात, क्षणिक पाणावणारे डोळे आणि कला क्षेत्रातील दिग्गजांकडून 'अनन्या'ला मिळालेली कौतुकाची थाप... असे एकंदरच आनंदी वातावरण पाहता 'मटा कल्चर क्लब'च्या सदस्यांसाठी 'अनन्या'चा प्रयोग रंगणार आहे. 'महाराष्ट्र टाइम्स कल्चर क्लब' या कार्यक्रमाचे माध्यम प्रायोजक आहे.
अभिनेत्री स्पृहा जोशीला ज्या एकांकिकेने खऱ्या अर्थाने ओळख मिळवून दिली, ती म्हणजे 'अनन्या.' लेखक प्रताप फडने नऊ वर्षांपूर्वी रुईया कॉलेजकडून ही एकांकिका बसवली होती. आता या एकांकिकेचे व्यावसायिक नाटक झाले आहे. 'सुयोग'निर्मित यानाटकात अनन्याच्या मुख्य भूमिकेत गुणी अभिनेत्री ऋतुजा बागवे. मुळात ऋतुजाही रुईया कॉलेजची माजी विद्यार्थिनी असल्यामुळे तिच्यासाठी 'अनन्या' ही एकांकिका खूप जवळची आहे. आता नाटकात अनन्याची भूमिका साकारण्यासाठी स्पृहाकडूनही काही खास टिप्स मिळाल्याचे ऋतुजा सांगते.
ऋतुजाने साकारलेली अनन्याची भूमिका खूप ताकदीची आहे. या भूमिकेसाठी तिने भावनिकदृष्ट्या तर स्वतःला तयार केलंच आहे. पण मानसिकदृष्ट्या आणि शारीरिकदृष्ट्या तिने जी मेहनत घेतली आहे ते तिच्या कामातून दिसून येते. प्रेक्षकांना थक्क करून ठेवणार हे नाटक आहे. यात अनन्याच्या भूमिकेत ऋतुजा बागवे, बाबांच्या भूमिकेत प्रमोद पवार, मैत्रिणीच्या भूमिकेत अनघा भगरे, नवऱ्याच्या भूमिकेत अजिंक्य ननावरे, भावाच्याभूमिकेत विशाल मोरे, मित्राच्या भूमिकेत सिद्धार्थ बोडके आहे. लेखक प्रताप फड यांना अनन्यासाठी श्रेष्ठ नाटककार म्हणून आचार्य अत्रे पुरस्कार जाहीर झाला आहे.
……………
कधी - बुधवार, १५ ऑगस्ट रोजी, रात्री ८.४५ वाजता
कुठे - सावित्रीबाई फुले नाट्यगृह,डोंबिवली
…………
प्रवेशिका -
प्रवेशिकेची मूळ किंमत ३५० रुपये असून 'महाराष्ट्र टाइम्स कल्चर क्लब' सभासदांना हे तिकीट सवलतीच्या दरात मिळणार आहेत. सभासदांना प्रत्येकी ५० टक्के सवलत देण्यात येत आहे. तर सभासद नसणाऱ्यांना ४९९ रुपयांमध्ये कल्चर क्लबचे वार्षिक सभासदत्व घेतल्यास नाटकाचे दोन तिकिटे मोफत मिळतील. प्रवेशिका केडीएमसी डोंबिवली स्टेशन जवळ-(पू) च्या तिकीट काउंटर वर सकाळी ८.३० ते ११ आणि सायंकाळी ५ ते ८ या वेळेत उपलब्ध आहेत. सभासदत्व आणि अधिक माहितीसाठी ९६७३६७०८३८ या क्रमांकावर सकाळी ११ ते सायंकाळी ७ यावेळेत संपर्क साधावा.