ताडीविक्रीला ‘अच्छे दिन’

जिल्ह्यातील १९१पैकी १७९ दुकानांना परवाने

म. टा. वृत्तसेवा, ठाणे

‘एक हजार परिपक्व ताडी झाडांमागे एक ताडीचे दुकान’ या अटीत राज्य सरकारने शिथिलता आणत कोकण विभागातील पालघर आणि रायगड जिल्ह्यांतून ताडी आणून विकण्यास मान्यता दिली आहे. परिणामी, लिलावाद्वारे वितरित होणाऱ्या ताडी विक्री परवाना प्रक्रियेला ठाणे जिल्ह्यात यावेळी चांगला प्रतिसाद मिळाला असून नुकत्याच झालेल्या लिलावात १९१ पैकी १७९ ताडी विक्री दुकानांचे परवाने देण्यात आले. तर, १२ ताडी परवान्यांचा लिलाव झाला नाही.

राज्यातील ताडी व्यावसायिकांच्या अडचणी लक्षात घेऊन शिवाय परवान्यांच्या आधारे ताडीचे दुकान चालवणाऱ्यांना स्थैर्य प्राप्त व्हावे तसेच कामगार रोजगारापासून वंचित राहू नये यासाठी २०१५-१६ करिता ज्यांच्याकडे २०१४-१५मध्ये टीडी-१ परवाना आहे, त्यांनी त्यांच्या सर्वोच्च बोलीवर १० टक्के वाढ करून परवाना शुल्क भरल्यास टीडी-१चे नूतनीकरण करण्याचा निर्णय सरकारने घेतला होता. ३१ ऑगस्ट २०१६मध्ये वर्ष संपल्यानंतर सप्टेंबर आणि ऑक्टोबर २०१६ या महिन्यासाठी मागील वर्षी कार्यरत असलेल्या ताडी परवानाधारकांना ३१ ऑक्टोबरपर्यंत मुदतवाढ देत २०१६-१७ या वर्षासाठी धोरण ठरवण्याबाबत सरकार विचाराधीन होते. त्यानुसार गेल्या वर्षी २८ ऑक्टोबर रोजी सरकारने ताडी दुकाने लिलाव आणि निविदापद्धतीने वितरित करण्याचा निर्णय घेतला. मात्र काही अटीदेखील घातल्या. ताडी वृक्ष असलेल्या तालुक्यात कायम रहिवाशी असलेल्या व्यक्ती आणि तालुक्यातील सहकारी, भागीदारी नोंदणीकृत संस्थांमध्येच लिलाव करावा, ज्या तालुक्यात किमान १०० परिपक्व ताडीची झाडे आहेत, त्याच तालुक्यात दुकाने देता येतील, एक हजार परिपक्व झाडांमागे एक दुकान हे धोरण अवलंबवण्यात यावे तसेच ज्या तालुक्यात ताडी दुकान मंजूर आहे, ते दुकान त्या तालुक्यातून इतरत्र हलविता येणार नाही, आदी अटींचा समावेश आहे. परंतु यातील झाडांच्या अटीमुळे ताडी विक्रेत्यांची पंचाईत झाली होती.

ठाणे जिल्ह्यात १५ हजार ५०० ताडीची झाडे आहेत आणि ताडी दुकानांची संख्या १९१ आहे. त्यामुळे जिल्ह्यात १ लाख ९१ ताडीची झाडांची आवश्यकता आहे. मात्र झाडांची संख्या कमी असल्याने २०१६मध्ये २१ नोव्हेंबर रोजी राज्य उत्पादन शुल्क ठाणे विभागाच्या ताडी परवाने लिलाव पद्धतीने वितरित करण्याच्या प्रक्रियेला काहीच प्रतिसाद मिळाला नव्हता. त्यानंतर गेल्या महिन्यात २१ ऑगस्ट रोजी सरकारने अटींमध्ये शिथिलता आणली. कोकण विभागातील मुंबई शहर, उपनगर आणि ठाणे जिल्ह्यामध्ये एक हजार परिपक्व झाडांची अट शिथिल करण्यात आली आणि पालघर, रायगड जिल्ह्यातून ताडी आणून विकण्यास सरकारने मान्यता दिली आहे.