ट्रॅव्हल एजन्सीकडून दीड लाखांचा गंडा

म. टा. वृत्तसेवा, नवी मुंबई

‘लिव्ह लाइफ हॉलिडेज’ ही ट्रॅव्हल एजन्सी चालविणाऱ्या दाम्पत्याने पनवेल भागात रहाणाऱ्या एका महिलेला एक लाख ७० हजार रुपयांना गंडा घातल्याचा प्रकार उघडकीस आला आहे. जीवन खरात आणि सुवर्णा खरात असे या दाम्पत्याचे नाव असून पनवेल शहर पोलिसांनी या दाम्पत्यावर फसवणूकीचा गुन्हा दाखल करून त्यांचा शोध सुरु केला आहे.

प्रगती सोनवणे या नवीन पनवेल सेक्टर ४ भागात रहाण्यास आहेत. गेल्या उन्हाळ्याच्या सुट्टीमध्ये सोनवणे यांना आई व सासू या दोघींना सिंगापूर येथे सहलीनिमित्त पाठवायचे होते. या एजन्सीचे चालक असणाऱ्या खरात दाम्पत्याने एकूण खर्च एक लाख ७० हजार रुपये असल्याचे सांगितले. आ एजन्सीच्या प्रतिनिधीने सोनवणे यांच्या कार्यालयात जाऊन त्यांच्याकडून ही रक्कम घेतली. मात्र एजन्सीने पुढे काहीच हालचाली केल्या नाहीत. त्यामुळे त्यांनी एजन्सी चालक खरात दाम्पत्याला संपर्क साधला असता, त्यांना वेगवेळी कारणे सांगून संपूर्ण उन्हाळ्याची सुट्टी घालवली. मात्र त्यानंतरही त्यांनी काहीच केले नाही. नंतर या खरात दाम्पत्याने आपले सर्व फोन व ठाण्यातील कार्यालय बंद करून पलायन केले. त्यानंतर त्यांनी या एजन्सी विरोधात पनवेल शहर पोलिस ठाण्यात तक्रार दाखल केली होती. या तक्रारीवरून खरात दाम्पत्याविरोधात फसवणुकीचा गुन्हा दाखल केल्याची माहिती पोलिस उपनिरीक्षक पालवे यांनी दिली. या दाम्पत्यावर ठाण्यातील कापुरबावडी पोलिस ठाण्यातही अशाच प्रकारचा गुन्हा दाखल असल्याची माहिती पालवे यांनी दिली.