म. टा. वृत्तसेवा, ठाणे
राष्ट्रीय बाल स्वास्थ्य कार्यक्रम आणि एपिलेप्सी फाऊंडेशनच्या वतीने जिल्हा रुग्णालयात घेण्यात आलेल्या एपिलेप्सी शिबिरातून १८४ रुग्णांवर मोफत उपचार करण्यात आले. ग्रामीण परिसरातील अनेक रुग्णांनी या शिबिराद्वारे उपचार घेतले.
फिट येणे, हात-पाय थरथरणे, शरीर वेडेवाकडे होणे, शुद्ध हरपणे अशी लक्षणे असलेल्या एपिलेप्सी आजाराचे ठाण्यात सुमारे एक हजारांच्या आसपास रुग्ण आहेत. या आजाराच्या रुग्णांना योग्य उपचार व मार्गदर्शन मिळण्यासाठी जिल्हा रुग्णालयात एक दिवसीय शिबीर घेण्यात आले. या अंतर्गत ठाण्यातील सुमारे १८४ रुग्णांवर उपचार करत तीन महिन्यांची मोफत औषधे देण्यात आली. यामध्ये लहान मुलांपासून ज्येष्ठ नागरिकांचा समावेश होता. भविष्यात या रुग्णांवर उपचार करावे लागले तर जिल्हा रुग्णालयात हे उपचार सरकारच्या आयुष्यमान योजनेतून मोफत उपचार करण्याचा प्रयत्न केला जाणार असल्याचे जिल्हा शल्यचिकित्सक डॉ. कैलास पवार यांनी सांगितले.