रिक्षाचालक, स्कूल व्हॅनवर झाड कोसळले

दुर्घटनेत रिक्षाचालक जखमी; नर्सरीमधील मुले थोडक्यात बचावली

म. टा. प्रतिनिधी, ठाणे

हरिनिवास सर्कलकडील भक्ती मंदिर रोडवर शुक्रवारी अजस्र वृक्ष उन्मळून पडल्याने झालेल्या दुर्घटनेत रिक्षाचालक जखमी झाला असून त्यांच्या डोक्याला व हाताला दुखापत झाली. या दुर्घटनाग्रस्त वृक्षाचा काही भाग घटनास्थळाच्या समोरच असलेल्या शाळेबाहेरील स्कूलव्हॅनवरही कोसळला. मात्र त्यातील मुलांना कोणतीही दुखापत झाली नाही.

ठाण्यातील हरिनिवास सर्कलकडून भक्ती मंदिरकडे जाणाऱ्या रस्त्यालगत ३० ते ३५ वर्षे जुने कडुनिंबाचे झाड होते. याठिकाणी समोरच रेम्बो स्कूल असून येथे प्ले ग्रुप व नर्सरी वर्गात शिकणाऱ्या मुलांसह त्यांच्या पालकांचीही कायम गर्दी असते. मात्र दुर्घटनेच्या काही मिनिटे आधीच शाळा सुटल्याने या भागात विद्यार्थी व पालकांची गर्दी कमीच होती. घटनास्थळी स्कूलव्हॅनचे चालक प्रभाकर जाधव मुलांना घरी नेण्यासाठी आले होते. त्यांच्या गाडीत चार मुलांना बसवून ते थांबले असता अचानक अजस्र कडुनिंबाचे झाड रस्त्यावरून जाणाऱ्या रिक्षासह जाधव यांच्या स्कूलव्हॅनवर कोसळले. यामध्ये रिक्षातील प्रवीण गायकर (४८) यांच्या हातासह डोक्याला जबर दुखापत झाली. तर, जाधव यांच्या स्कूलव्हॅनच्या समोरील भागावर झाडाचा भाग कोसळल्याने वाहनाचे नुकसान झाले. तर, व्हॅनमध्ये शाळकरी मुले पाठीमागे बसली होती. तेथील काच झाड व्हॅनच्या पुढील भागात कोसळताच फुटली. मात्र तरीही व्हॅनमधील एकाही मुलाला दुखापत न झाल्याची माहिती व्हॅनचालक जाधव यांनी ‘मटा’शी बोलताना दिली.

या दुर्घटनेत जखमी झालेल्या रिक्षाचालक गायकर यांना जिल्हा सरकारी रुग्णालयात दाखल करण्यात आले असून त्यांची प्रकृती ठीक असल्याचे त्यांच्या नातेवाईकांनी सांगितले. या दुर्घटनेत रिक्षाचे प्रचंड नुकसान झाले असून अग्निशमन दलासह ठाणे प्रादेशिक आपत्ती व्यवस्थापन कक्षाच्या कर्मचाऱ्यांनी घटनास्थळी धाव घेत झाड हटवले. तसेच, आजूबाजूच्या झाडांच्या जीर्ण फांद्याही हटवण्यात आल्या. मात्र या घटनेमुळे पुन्हा एकदा धोकादायक झाडांचा प्रश्न ऐरणीवर आला आहे.