विरार-डहाणू लोकलवर झाड कोसळले

म. टा. वृत्तसेवा, पालघर

पश्चिम रेल्वेवरील विरारवरून डहाणूकडे जाणाऱ्या लोकलवर पालघर-उमरोळी स्थानकादरम्यान रविवार, १७ जून रोजी दुपारी पाऊण वाजण्याच्या सुमारास जोरदार पावसामुळे रेल्वेरुळाच्या कडेला असलेले झाड लोकलवर पडल्याने मोठा अपघात होता होता वाचल्याची घटना घडली.

विरारवरून डहाणूकडे जाणारी लोकल रविवारी दुपारी १२ वाजून ४८ वाजता पालघर रेल्वे स्थानकातून सुटल्यावर काही अंतरावर पोहोचली असता जोरदार पावसाला सुरुवात झाली. त्यामुळे प्रवाशांनी लोकलच्या डब्याचे दरवाजे, खिडक्या बंद केल्या. कोळगाव फाटक पार केल्यानंतर रेल्वे रुळाच्या जवळ उभे असलेले मोठे झाड लोकलगाडीच्या मध्यभागी कोसळले.

झाड कोसळल्यानंतर मोठा आवाज येऊन लोकलला जोरदार हादरे बसल्याचे प्रवासी सत्यवान सापने यांनी पत्रकारांना सांगितले. मोटरमनने प्रसंगावधान राखत मोटरमनने लोकल तात्काळ थांबविली आणि झाड हटविण्यासाठी संबंधित यंत्रणेला वायरलेसवरून संदेश दिला. लोकल ट्रेनवर पडलेले हे मोठे झाड हलविण्यासाठी तब्बल ३५ ते ४० मिनिटांचा कालावधी लागल्याने लोकल डाऊन बाजूला उभी होती. या वेळी विरार बाजूने आलेल्या अन्य लोकलसह काही मेल एक्स्प्रेस गाड्या डाऊन दिशेवरच उभ्या राहिल्याने काही काळासाठी रेल्वेसेवा विस्कळीत झाली होती.

डहाणू ते वैतरणा या उपनगरीय दर्जा दिलेल्या भागाला कमी लोकलसेवा असल्याने प्रत्येक लोकलला गर्दी असते. त्यामुळे अनेक प्रवासी दरवाजात लोंबकळत प्रवास करीत असतात. रविवारच्या डहाणू लोकलमध्येही मोठी गर्दी होती. मात्र मोठा पाऊस आल्याने प्रवाशांनी दरवाजे खिडक्या बंद केले होते. झाड पडल्यानंतर अनेक डबे घासत गेल्याने प्राणहानीची घटना टळली. या घटनेसंदर्भात पालघर स्थानकाचे स्टेशन प्रबंधक एच. कोहली यांच्याशी संपर्क साधला असता, त्यांनी फोन उचलला नाही. तर, पश्चिम रेल्वेचे मुख्य जनसंपर्क अधिकारी रवींद्र भाकर यांच्याशी पत्रकारांनी संपर्क साधला असता, 'रेल्वे बोर्डाचे चेअरमन आल्याने मी मीटिंगमध्ये बिझी आहे,' असे त्यांनी सांगितले.