आदिवासी विद्यार्थ्यांची चढाई एव्हरेस्टवर!

म. टा. वृत्तसेवा, पालघर

सन २०१९ वर्षासाठी 'मिशन शौर्य'अंतर्गत माऊंट एव्हरेस्ट हे देशातील सर्वोच्च शिखर सर करण्यासाठी पालघर जिल्ह्यातील जव्हार तालुक्यातील प्रकल्पातून देवगाव येथील माधवराव काणे आश्रम शाळेतील दोघां आदिवासी विद्यार्थ्यांची निवड करण्यात आली आहे. पालघर जिल्ह्याला हा मान मिळाल्याबद्दल या विद्यार्थ्यांवर समाजातील सर्वच स्तरांतून अभिनंदनाचा वर्षाव होत आहे.

वाडा तालुक्यातील देवगाव आश्रमशाळेत इयत्ता अकरावीत शिक्षण घेणारे केतन सीताराम जाधव व रंजित शंकर दळवी या दोघा विद्यार्थ्यांची निवड माऊंट एव्हरेस्ट सर करण्यासाठी झाली असून, त्यांना दार्जिलिंग येथे पाठवण्यात आले आहे.

'मिशन शौर्य' अंतर्गत या दोघांना निवड चाचणीचा पहिला टप्पा पूर्ण करण्यासाठी वर्धा येथे पाच दिवसांच्या प्रशिक्षणासाठी पाठवण्यात आले होते. पहिल्या टप्यातील प्रशिक्षणात दोन्ही मुलांची कामगिरी चांगली झाली. त्यामुळे ही मुले पाच दिवसांचा प्रशिक्षणाचा दुसरा टप्पा पूर्ण करण्यासाठी हैदराबाद येथे गेली. हा टप्पादेखील या विद्यार्थ्यांनी चांगल्या गुमांनी पूर्ण केला. त्यामुळे तिसऱ्या टप्प्यात या दोघां विद्यार्थ्यांची निवड झाली असून, एका महिन्याच्या प्रशिक्षणासाठी या दोघांना विद्यार्थ्यांना दार्जिलिंग येथे पाठवण्यात आल्याचे मुख्याध्यापकांनी सांगितले.

माऊंट एव्हरेस्ट मोहिमेच्या निवडीसाठी प्राथमिक मुख्याध्यापक ज्योती भोये, माध्यमिक मुख्याध्यापक सुरेश गोतारणे तसेच त्या विद्यार्थ्यांचे शिक्षक, प्रशिक्षक परशुराम चौधरी या शिक्षकांनी प्रयत्न केले. या दोघा विद्यार्थ्यांच्या निवडीमुळे सर्वच स्तरातून आणि शिक्षक, विद्यार्थी पालकांकडून या विद्यार्थ्यांवर अभिनंदनाचा वर्षाव होत आहे.