रेल्वे रुळांवर सापडली अडीच महिन्यांची बालिका

म. टा. वृत्तसेवा, वसई

विरारमध्ये अडीच ते तीन महिन्यांची मुलगी मंगळवारी पहाटे नारिंगी परिसरातील रहिवाशांना आढळली. नारिंगी रेल्वे फाटक विरार पश्चिमपासून अंदाजे १०० ते १५० मीटर अंतरावर विरारकडील बाजूस रेल्वे रूळापासून या मुलीला ठेवण्यात आले होते.

पहाटे साडेचार वाजता लहान बालक रडत असल्याचा आवाज आल्यानंतर जवळच्या रहिवाशांनी जाऊन पाहिले असता त्यांनी ही लहानगी दिसून आली. परिसरातील एका महिलेने या लहानगीला घरी आणून तिला दूध पाजले व त्यानंतर या मुलीला विरार पोलिस ठाण्यात आणले. मंगळवारी दुपारी पोलिसांनी विरार पश्चिमेच्या सरकारी ग्रामीण रुग्णालयात या मुलीला नेले. मात्र आमच्याकडे यंत्रणा व आवश्यक तो कर्मचारी वर्ग नाही असे कारण देत तिला दाखल करून घेण्यास नकार दिला. त्यानंतर या मुलीला बोरिवली येथील भगवती रुग्णालयात नेण्यात येणार आहे, असे पोलिस निरीक्षक युनूस शेख यांनी सांगितले. मुलीवर उपचार झाल्यानंतर तिला बालसंगोपन केंद्रात सोडावे लागेल, असेही पोलिसांनी सांगितले. अशाप्रकारे या मुलीला उघड्यावर कुणी सोडून दिले त्या पालकांचा शोध घेत आहोत, असे पोलिसांनी सांगितले.