म. टा. प्रतिनिधी, ठाणे कोपरी-पाचपाखाडीचे शिवसेना उमेदवार आणि ठाणे जिल्ह्याचे पालकमंत्री एकनाथ शिंदे यांच्या प्रचारासाठी आलेल्या उद्धव ठाकरे यांनी किसननगर येथील शिवसेना शाखेला भेट दिली. एकेकाळी एकनाथ शिंदे याच शाखेचे शाखाप्रमुख होते. त्यावेळी त्यांनी या शाखेची स्थापना केली होती. शिवसेना पक्षप्रमुखांच्या भेटीमुळे शिवसैनिकांनी जल्लोष व्यक्त केला. ठाकरे यांनी यावेळी छत्रपती शिवाजी महाराजांच्या पुतळ्याचे दर्शन घेतले आणि तिथे अभ्यागतांसाठी ठेवलेल्या रजिस्टरमध्ये त्यांनी अभिप्रायही लिहिला. शिवसेनाप्रमुख बाळासाहेब ठाकरे यांची वागळे इस्टेट भागात १९९२ साली जाहीर सभा झाली होती. त्यानंतर प्रथमच उद्धव यांनी वागळे इस्टेट भागात आले होते. 'बाळासाहेबांच्या आदेशाने धर्मवीर आनंद दिघे यांनी १९८१मध्ये शिंदे यांची शाखाप्रमुख म्हणून नियुक्ती केली. त्यानंतर ही शाखा बांधण्यात आली होती. किल्ल्याच्या तटबंदीप्रमाणे बांधलेल्या या शाखेच्या माध्यमातून शिवसेना या भागात रुजली आणि संपूर्ण वागळे इस्टेटचा परिसर हा शिवसेनेसाठी भक्कम तटबंदीच आहे. या शाखेला उद्धवसाहेबांनी भेट देणे, हा आमचा मोठा सन्मान आहे,' अशी भावना शिंदे यांनी व्यक्त केली.
किसननगर शाखेला उद्धव यांची भेट
म टा...
महाराष्ट्र टाइम्स.कॉम 19 Oct 2019, 4:00 am