लाचखोर पालिका कर्मचाऱ्याला अटक

म. टा. वृत्तसेवा, उल्हासनगर

उल्हासनगर महापालिकेतील एका निलंबित कर्मचाऱ्याचा थकीत पगार मिळवून देण्यासाठी दोन हजार रुपयांची लाच मागणाऱ्या संजय पवार या लिपिकाला लाचलुचपत प्रतिबंधक विभागाने सापळा रचून अटक केली.

उल्हासनगर महानगरपालिकेत अतिक्रमण विभागात संजय पवार हे लिपिक पदावर कार्यरत आहेत. पालिकेतील एका निलंबित कर्मचाऱ्याचा थकीत पगार मिळवून देण्याचे आश्वासन देत पवार वारंवार त्या कर्मचाऱ्याकडे पैशांची मागणी करत होता. अखेर याला वैतागून तक्रारदादाराने ठाण्याच्या लाचलुचपत विभागाशी संपर्क साधून पवार यांच्या विरोधात तक्रार केली. या तक्रारीची दखल घेत गुरुवारी दुपारी साडेबाराच्या सुमारास पोलिस निरीक्षक यांच्या नेतृत्वाखाली रामेश्वर बोदडे, प्रशांत घोलप यांनी सापळा रचून संजय पवार याला रंगेहात अटक केली आहे.