वालधुनी नदीत बुडून चिमुकल्याचा मृत्यू

मटा ऑनलाइन वृत्त । उल्हासनगर

उल्हासनगरमधील वडोळ गावातील एक सहा वर्षांचा चिमुकला वालधुनी नदीत वाहून गेल्याची घटना घडली आहे. गणेश जैसवार असं या मुलाचं नाव आहे.

वडोळ गावातून उल्हासनगर कॅम्प ३ कडे जाणाऱ्या रस्त्यामध्ये वालधुनी नदीचा मोठा प्रवाह आहे. या नदीवर लोखंडी पूल होता. हा पूल कोसळल्यानंतर तिथे सिमेंटचा पूल उभारण्याचं काम महापालिकेने ठेकेदारांना दिलं होतं. मात्र, हे काम मनमानी पद्धतीने सुरू असल्याचा अहवाल दिल्यानंतर ते थांबवण्यात आलं होतं. ठेकेदारानं महापालिकेच्या मदतीनं वडोळ गावात जाण्यासाठी तात्पुरता रस्ता म्हणून फळ्या टाकल्या होत्या. मागील दोन दिवसांच्या पावसामुळं नदीचं पाणी वाढल्यानं फळ्या वाहून गेल्या होत्या. त्यामुळं गावात जाणारे लोक दगडावरून ये-जा करत होते. मंगळवारी संध्याकाळी गणेश जैसवार ( 6 ) हा मुलगा दगडावरून जात होता. मात्र त्याला पाण्याचा अंदाज न आल्याने तो नदीत पडला आणि वाहून गेला. या घटनेची माहिती मिळताच अग्निशमन दलाने त्याचा शोध घेतल्यानंतर बुधवारी सकाळी त्याचा मृतदेह बाहेर काढण्यात आला आहे.