​ त्या महिलेच्या वारसांना २२ लाखांची भरपाई

वसई न्यायालयाचा परिवहन सेवा चालकाला दणका

म. टा. वृत्तसेवा, वसई

वसई-विरार शहर महापालिकेच्या परिवहन बसमधून पडून मरण पावलेल्या पाचूबंदर येथील पिलोमिना सजन या महिलेच्या वारसांना व्याजासह २२ लाख ५२ हजार ८३२ रुपये नुकसानभरपाई देण्याचा आदेश वसई न्यायालयाने दिला आहे. माजी नगरसेवक संजय कोळी यांनी ही माहिती दिली.

पिलोमिना व्हॅलेंटाईन सजन (५४) ही मच्छीविक्रेती महिला १८ डिसेंबर २०१३ रोजी महापालिकेच्या परिवहन सेवेच्या बसमधून पडून जखमी झाली होती. रुग्णालयात ४९ दिवस मृत्युशी झुंज दिल्यानंतर ६ फेब्रुवारी २०१४ रोजी उपचारादरम्यान पिलोमिना यांचे निधन झाले होते. त्यांच्या उपचारावर लाखो रुपये खर्च झाले होते.

या प्रकरणी या महिलेच्या वारसांना महापालिका तसेच परिवहन सेवा चालविणारी भागिरथी ट्रान्सपोर्ट प्रायव्हेट लिमिटेड कंपनी यांच्याकडून नुकसानभरपाई मिळावी, म्हणून पालिकेचे तत्कालीन नगरसेवक संजय कोळी यांनी पालिका महासभेत लक्ष वेधले होते. मात्र महापालिकेने कोणत्याही प्रकारची भरपाई दिली नाही.

संजय कोळी आणि होळी येथील साधना राऊत यांनी हे प्रकरण मोटार अपघात दावे लवादाकडे नेले. याप्रकरणी सविस्तर युक्तिवाद व संबंधितांच्या उलट तपासण्या झाल्या. गेली तीन वर्ष हे प्रकरण सुरू होते. लवादाने मृत पिलोमिना सजन हिच्या वारसांना १९ लाख ११ हजार ७५४ रुपये व त्यावरील ७ टक्के व्याज मिळून एकूण २२ लाख ५२ हजार ८३२ रुपये इतकी नुकसानभरपाई म्हणून देण्याचा आदेश पारीत केला, अशी माहिती कोळी यांनी दिली. भागिरथी ट्रान्सपोर्ट कंपनी व आयसीआयसीआय लोम्बार्ड जनरल इन्शुरन्स कंपनी लिमिटेड यांनी ही नुकसानभरपाईची रक्कम द्यायची आहे.