‘वसईकरांच्या समस्या ऐकण्यासाठी वेळ देणार’

वसईत आनंद ठाकूर यांच्या जनसंपर्क कार्यालयाचे उद्‍घाटन

म. टा. वृत्तसेवा, वसई

वसईत अनेक समस्या आहेत. वसईतील नागरिकांच्या समस्या ऐकून व जाणून घेण्यासाठी वसईत जनसंपर्क कार्यालय सुरू करण्यात आले आहे. १० ते १५ दिवसांतून एकदा कार्यालयात उपस्थित राहून वसईकरांना वेळ देणार आहोत, असे आमदार आनंद ठाकूर यांनी सांगितले.

राष्ट्रवादी काँग्रेस पक्ष वसई-विरार शहर जिल्ह्यातर्फे पक्षाचे अध्यक्ष खासदार शरद पवार यांच्या ७७व्या वाढदिवसानिमित्त स्वाभिमान सप्ताहाचे आयोजन करण्यात आले होते. यानिमित्त विविध सामाजिक कार्यक्रम आयोजित करण्यात आले होते. यानिमित्त आनंद ठाकूर यांच्या जनसंपर्क कार्यालयाचे उद्घाटन सागर पार्क, बिल्डिंग क्र.२, सागरशेट पेट्रोलपंपजवळ, वसई गाव येथे करण्यात आले. त्याचबरोबर त्यांच्या फेसबुक पेजचेही अनावरण यावेळी करण्यात आले. यावेळी ठाकूर यांनी डॉक्टर्स, शिक्षक आणि नागरिक यांच्याशी संवाद साधला. वसईतील नागरिकांच्या सोयीसाठी हे कार्यालय सुरू करण्यात आले आहे, असे त्यांनी सांगितले. तसेच आदिवासी बांधवांच्या शिष्टमंडळाने त्यांच्यावर होत असणाऱ्या अन्याय व समस्यांबाबत ठाकूर यांना निवेदन दिले. कार्यालय उद्घाटनप्रसंगी ठाकूर यांनी या कार्यालयामध्ये आपण आठवड्यातून किंवा १०-१५ दिवसातून एक वेळा येथील नागरिकांसाठी उपलब्ध राहून सुसंवाद साधणार आहोत आणि नागरी समस्यांचे निराकरण करणार असल्याचे सांगितले. वसई-विरारमधील नागरिकांनी आपल्या समस्या, प्रश्न या कार्यालयात घेऊन यावे, असे आवाहन त्यांनी केले.

स्वाभिमान सप्ताहानिमित्त खास मुलींसाठी बॉक्स क्रिकेट स्पर्धेचे आयोजन, तसेच रक्तदान शिबिराचे आयोजनही करण्यात आले होते.

यावेळी राष्ट्रवादीचे जिल्हाध्यक्ष गोविंदा गुंजाळकर यांच्या अध्यक्षतेखाली कार्यक्रम झाला. कार्याध्यक्ष राजाराम मुळीक, न्यु इंग्लिश स्कुल अँड ज्युनिअर कॉलेजचे प्राचार्य माणिक दुतोंडे व इतर पदाधिकारी मोठ्या प्रमाणात उपस्थित होते.