तुंगारेश्‍वरला पुरातन मंदिर घोषित करण्यासाठी साकडे

म. टा. वृत्तसेवा, वसई

महाराष्ट्र टाइम्स.कॉम

वसई तालुक्यातील पुरातन प्रसिद्ध तुंगारेश्‍वर महादेव देवस्थानचा महाराष्ट्र राज्याच्या 'पुरातन मंदिर यादीत' समावेश करावा, अशी मागणी वसईकरांतून होत आहे. यासाठी राज्याच्या मुख्यमंत्र्यांकडे वसईकरांनी साकडे घातले आहे.

वसईच्या निसर्गरम्य पर्वतांच्या कुशीत असलेल्या तुंगारेश्‍वर महादेव मंदिराला राज्य सरकारने २००१ साली 'क' वर्गीय पर्यटन क्षेत्र म्हणून घोषित केले. 'तुंग' नावाच्या राक्षसाचा भगवान शंकरांनी वध केल्याने या देवस्थानला 'तुंगारेश्‍वर महादेव' असे नाव पडले, असे सांगितले जाते. या देवस्थानचा उल्लेख पुराण कथांमध्येही आढळून येतो. 'तुंगार' या शब्दाचा अर्थच शिवोपासकांचा एक वर्ग असा आहे. तुंगारेश्‍वर मंदिरापासून ३-४ मैलांवर मत्यच्च पर्वत शिखरावर भगवान परशुरामांच्या वास्तव्याने पावन झालेले 'परशुराम कुंड' हे तीर्थक्षेत्र आहे. तिथेच प्रसिद्ध संतश्री बालयोगी सदानंद महाराजांचा आश्रम आहे. त्यामुळे 'तुंगारेश्‍वर' हे हिंदू धर्मीयांसाठी विशेष स्थान आहे. श्रावण महिना, महाशिवरात्र तसेच वर्षभर लाखोंच्या संख्येने शिवभक्त दर्शनासाठी येथे येत असतात. तुंगारेश्‍वर देवस्थान विश्‍वस्त मंडळ भक्तांना आपल्या परिने सुविधा देण्याचा, परिसराचा विकास करण्याचा प्रयत्न करीत आहे. मात्र आर्थिक पाठबळ कमी पडत असल्याने त्यांच्या कामाला मर्यादा येत आहेत. त्यातच गेल्या २० वर्षांत राज्य सरकारने तुंगारेश्‍वर महादेवांच्या दर्शनासाठी येणाऱ्या लाखो भक्तांना आणि पर्यटकांना कोणत्याही सोयी-सुविधा दिलेल्या नाहीत. त्यामुळे या सोयी सुविधा उपलब्ध व्हाव्यात, याकडेही मुख्यमंत्री उद्धव ठाकरे यांचे लक्ष वेधण्यात आले.

तुंगारेश्‍वर महादेव देवस्थानचा महाराष्ट्र राज्याच्या 'पुरातन मंदिर यादीत' समावेश करावा, अशी मागणी मुख्यमंत्री उद्धव ठाकरे यांच्याकडे तुंगारेश्‍वर देवस्थान विश्‍वस्त मंडळाचे अध्यक्ष पुरुषोत्तम पाटील यांनी केली. तसेच मंदिर अतिशय प्राचीन-पुरातन असून राज्य सरकारच्या नव्या धोरणानुसार पुरातन मंदिरांना मिळणारा विकासनिधी तुंगारेश्‍वर महादेव मंदिराला मिळण्यासाठी प्राधान्य द्यावे, अशी मागणीही केली आहे.

राष्ट्रवादी काँग्रेसचीही मागणी

वसई तालुका राष्ट्रवादी काँग्रेसचे अध्यक्ष नितीन म्हात्रे व हेमंत कहार यांनीही उपमुख्यमंत्री अजित पवार यांचे लक्ष तुंगारेश्‍वर महादेव मंदिराच्या समस्येकडे वेधले. तुंगारेश्‍वर आणि परशुराम कुंड येथे दर्शनासाठी जाणाऱ्या भक्तांकडून वसूल केला जाणारा कर रद्द करण्यात यावा, अशी मागणी नितीन म्हात्रे यांनी उपमुख्यमंत्र्यांकडे केली. सातिवली-परशुराम कुंड आणि पारोळ-परशुराम कुंड रस्त्यांची दुरवस्था झाली असून वाहने चालविणे आणि पायी प्रवास करणे जिकिरीचे झाले आहे, हेही त्यांनी अधोरेखित केले.