नागरिकांना सहकार्य करण्याचे आवाहन
म. टा. वृत्तसेवा, वसई
वसई-विरार शहर महानगरपालिका क्षेत्राअंतर्गत जुचंद्र व परिसरात नवीन पाइप लाइन व इतर कामे लवकरच सुरू होणार आहेत. तसेच सद्यस्थितीमध्ये गावातील जुनी जलवाहिनीच्या दुरुस्तीचे काम गेल्या चार दिवसांपासून सुरू असून नागरिकांनी सहकार्य करावे, असे आवाहन करण्यात आले आहे.
जुचंद्र व परिसराची लोकसंख्या वेगाने वाढत आहे. गावात असलेला पाझर तलाव हा जूचंद्र व परिसराकरीता पाणी पुरवठ्याचा खूप जुना एकमेव स्त्रोत आहे. पाझर तलाव ते जूचंद्रपर्यंत अंथरण्यात आलेली मुख्य पाणीवितरण पाइप लाइन २५ वर्षे जुनी असल्याने जीर्ण व कमकुवत झालेली आहे. त्यामुळे ही पाइप लाइन फुटणे, गळती होणे व इतर समस्या वारंवार निर्माण होत आहेत. सद्यस्थितीत महापालिकेमार्फत पाझर तलाव ते जूचंद्र या मुख्य पाइप लाइन दुरुस्तीचे काम युद्धपातळीवर हाती घेण्यात आलेले आहे. हे दुरुस्ती काम येत्या आठवडाभरात पूर्ण करण्याचे नियोजन आहे. ही पाइप लाइन बहुतांशी खाडी परिसरातून आल्याने दुरुस्तीच्या कामात अडचणी येत आहेत. हे दुरुस्तीचे काम पूर्ण व्हायला वेळ लागेल, असे प्रभाग क्रमांक १०५चे नगरसेवक कन्हैया भोईर यांनी सांगितले आहे.
पाझर तलावाच्या या पाइप लाइन दुरुस्तीमुळे नागरिकांना महानगरपालिकेच्या पेल्हार धरणातून पाणीपुरवठा सुरू करण्यात आला आहे. हे पाणी गढूळ असल्याने नागरिकांनी पाणी शुद्ध करण्यासाठी तुरटीचा वापर करावा व पाणी उकळून प्यावे. जूचंद्र भागातील सर्व नागरीकांनी सहकार्य करावे, असे आवाहन त्यांनी केले आहे.