पालघरच्या कराटेपटूंचा सन्मान

म. टा. वृत्तसेवा, पालघर

एशियन शितोरियू स्पोर्टस् कराटे डो असोसिएशन यांच्यातर्फे मुंबईतील न्यूझीलंड होस्टेल येथे नुकत्याच झालेल्या ‘एशिया कप २०१६’ आंतरराष्ट्रीय कराटे स्पर्धेत भारतीय संघातील पालघरच्या नीलेश गायकवाड यांनी रौप्यपदक पटकावले. नीलेश गायकवाड हे पूज्य आचार्य भिसे विद्यालय, कासा (डहाणू) या शाळेचे क्रीडाशिक्षक आहेत. त्यांच्या मार्गदर्शनाखाली याच स्पर्धेत मानस गायकवाड (वयोगट ७ वर्षे) याने २ सुवर्णपदके व मंथन गायकवाड (वयोगट ९ वर्षे) याने १ सुवर्णपदक पटकावले.

या स्पर्धा विविध वयोगटात व वजनी गटात काता कुमिते प्रकारात घेण्यात आल्या. या स्पर्धेत भारत, श्रीलंका, नेपाळ, भूतान, बांगलादेशच्या ९८५ कराटेपटूंचा सहभाग होता.

नीलेश गायकवाड हे अखिल भारतीय कराटे महासंघाचे अधिकृत प्रशिक्षक असून अनेक स्पर्धांमध्ये राष्ट्रीय पंच म्हणून त्यांनी जबाबदारी भूषवली आहे. वाडा, विक्रमगड, जव्हार, डहाणू, भिवंडी यांसारख्या ग्रामीण भागातील विद्यार्थ्यांना ते कराटेचे प्रशिक्षण देतात. त्यांच्या मार्गदर्शनाखाली तयार झालेल्या कराटेपटूंनी वेगवेगळ्या स्पर्धांमध्ये राष्ट्रीय स्तरापर्यंत प्रतिनिधित्व केले आहे. त्यांच्या या प्रदीर्घ कामकाजाची दखल घेऊन २०११मध्ये त्यांना ‘शब्दमशाल’ यांच्यातर्फे ठाणे जिल्ह्यातून ‘आदर्श क्रीडा शिक्षक’ पुरस्कार देऊन सन्मानित करण्यात आले. २०१४मध्ये महाराष्ट्र कराटेस्पोर्ट्स असोसिएशन ऑफ ठाणे यांच्यामार्फत ‘उत्कृष्ट कराटे प्रशिक्षक’ म्हणून सन्मानित करण्यात आले. खो-खो, लंगडी या खेळाचे ते अधिकृत जिल्हास्तरीय पंच असून कबड्डी खेळाचे राज्यस्तरीय पंच म्हणून काम पाहतात. कबड्डी राज्यस्तरीय पंच परीक्षा पास झाल्याबद्दल शिक्षक आमदार रामनाथ मोते यांनीही त्यांना सन्मानित केले आहे.

त्यांच्या या कामगिरीबद्दल शिक्षण प्रसारक मंडळाचे अध्यक्ष व आमदार आनंद ठाकूर, सचिव आप्पासाहेब भोये, सहसचिव पांडुरंग बेलकर, कार्याध्यक्ष शंकर नम यांनी त्यांचे अभिनंदन केले आहे.