​ लेखन करिअर म्हणून पाहिले जात नाही

वीणा गवाणकर यांची खंत

म. टा. वृत्तसेवा, डोंबिवली

परदेशात लेखकांचे मानधन जास्त असते, पुस्तकासाठी त्यांना १० लाख डॉलरचेही मानधन दिले जाते. मात्र आपल्याकडे ही परिस्थिती नाही. त्यामुळेच लेखनाकडे करिअर म्हणून कोणी बघत नसल्याची खंत प्रसिद्ध लेखिका वीणा गवाणकर यांनी डोंबिवलीत व्यक्त केली. कुडाळदेशकर गौड ब्राह्मण सहयोग, डोंबिवली यांच्यातर्फे वीणा गवाणकर यांचा सत्कार आणि मुलाखतीचे आयोजन करण्यात आले होते. अस्मिता सावंत यांनी त्यांची मुलाखत घेतली. त्यावेळी त्या बोलत होत्या.

लेखकाला काही मिळाले नाही तरी चालेल, पण पुस्तके स्वस्त मिळाली पाहिजेत, अशी वृत्ती आपल्याकडे तयार झाली आहे. त्यामुळे हल्ली लेखनाकडे बघण्याचा दृष्टिकोनच बदलला असून त्याकडे करिअर म्हणून बघितले जात नसल्याचे गवाणकर म्हणाल्या. लेखक ही पदवी लावण्याची अनेकांची इच्छा असते, त्यासाठी बरेच लोक उत्सुक असतात, पण लेखनात पैसा नसल्याने त्याकडे करिअर म्हणून कोणी बघितले जात नाही, अशी खंत गवाणकर यांनी यावेळी व्यक्त केली. आजची पिढी ब्लॉग लिहू लागली आहे. ही बाब समाधानकारक असली तरी त्याला व्यापकता नाही, असेही त्यांनी यावेळी सांगितले.

वाचनसंस्कृती वाढवण्यासाठी पालकांनी लक्ष देण्याची गरज आहे. घरात पुस्तके असतील, तर मुले लवकर वाचायला लागतील. आजी-आजोबांचे काम मुलांना वाचायला लावणे आहे, असा सल्लाही त्यांनी दिला. पालक मुलांना किती वेळ देतात, हे महत्त्वाचे आहे. ‘एक होता कार्व्हर’ही काल्पनिक कादंबरी असती, तर ती भावली नसती. ते वास्तव आहे, म्हटल्यावर तुम्हीही ते इतरांना वाचण्याची शिफारस करता, असे यावेळी त्यांनी सांगितले.