म. टा. प्रतिनिधी, ठाणे
'वर्ल्ड फोरम ऑन अर्ली चाइल्डहूड केअर अँड एज्युकेशन' या बालशिक्षण संदर्भातील जागतिक परिषदेत नौपाडा येथील सरस्वती मंदिर ट्रस्टच्या इंग्रजी माध्यमाच्या मुख्याध्यापिका विशाखा देशपांडे यांची निवड झाली आहे. विद्यार्थीदशेत खेळांचे महत्त्व आणि त्याचा व्यक्तिमत्व विकासासाठी केला जाणारा वापर, या विषयांवर मार्गदर्शन करण्याचा मान नौपाडा येथील सरस्वती मंदिर ट्रस्टच्या इंग्रजी माध्यमाच्या मुख्याध्यापिका विशाखा देशपांडे यांनी मिळवला आहे.
८ एप्रिलपासून चीन येथील मकाऊ या ठिकाणी ही परिषद होत आहे. बालशिक्षणाच्या विषयाच्या विविध पैलूंचा वेध यामध्ये घेतला जाणार आहे. या विषयाचे सादरीकरण देशपांडे करणार आहेत. या व्यतिरिक्त बालशिक्षणात खेळांचे असलेले महत्त्व या विषयातील प्रमुख मार्गदर्शिका म्हणून त्या भूमिका निभावणार आहेत. ही जागतिक परिषद अमेरिकेच्या वर्ल्ड फोरम फाऊंडेशनतर्फे भरवली जात असून त्यामध्ये जगभरातील ८० ते १०० देशांतील सुमारे ८०० प्रतिनिधी सहभागी होणार आहेत. बालके आणि बालशिक्षणातील असलेली आव्हाने तसेच उपलब्ध संधी यांवर चर्चा केली जाणार आहे. विशाखा देशपांडे यांनी यापूर्वीही आंतरराष्ट्रीय स्तरावरील परिषदांमध्ये देशातील बालशिक्षणाबाबत मार्गदर्शन केले आहे. या परिषदेत मार्गदर्शक म्हणून प्रमुख चर्चासत्रांचे अध्यक्षपद सांभाळणार आहेत.
बालशिक्षण या विषयासंदर्भात अधिक चर्चा होणे गरजेचे असतानाच या परिषदेचे निमंत्रण येणे, हा माझा बहुमान आहे. यानिमित्ताने बालशिक्षणाबाबत जगभरात सुरू असलेल्या प्रयोगांची माहिती मिळते आणि त्यानिमित्ताने आपल्या देशातही नवे प्रयोग सुरू करता येतात, असे विशाखा देशपांडे यांनी सांगितले.