स्थानिकांचा संताप; परवानग्यांशिवाय कामे केल्याचा स्थानिकांचा आरोप
म. टा. प्रतिनिधी, ठाणे
ठाणे महापालिकेच्या नितीन कंपनी परिसरातील अग्निशमन केंद्राच्या इमारतीपासून अवघ्या दोन फुटांच्या अंतरावर जाहिरात फलकासाठी भव्य लोखंडी सांगाडा उभारण्यात आला आहे. हा सांगाडा उभारताना शहर विकास विभागांच्या नियमांची पायमल्ली झाली असल्याचा आरोप स्थानिक रहिवाशांनी केला आहे. अग्निशमन केंद्राच्या इमारतींपासून अवघ्या दोन फुटांवर भलामोठा खड्डा खणून हा सांगाडा उभा करण्यात आला. या खोदकामामुळे आजूबाजूच्या इमारतींना मोठा धक्का पोहोचल्याने परिसरातील प्रेस्टिज गार्डन सोसायटीकडून प्रशासनाकडे संताप व्यक्त केला आहे.
ठाणे महापालिकेकडून जाहिरात ठेकेदारांना शहरामध्ये जाहिराती करण्यासाठी वेगवेगळे मार्ग खुले करून दिले आहेत. त्यामध्ये सॅटिस प्रकल्प, बसथांबे, उड्डाणपुलांच्या दुतर्फा जागा, उद्याने, स्वच्छतागृह, कचरापेट्या, हवाशुद्धिकरण यंत्र आणि महापालिकेच्या मालमत्ताही आता जाहिरात ठेकेदारांना आंदण देण्याचे नवे मार्ग शोधले जात आहेत. त्यातून नितीन कंपनी येथील अग्निशमन केंद्राच्या इमारतीला लागून भव्य जाहिरात सांगाडा उभा करण्याचे काम सुरू करण्यात आले आहे. या जाहिरात फलकाच्या उभारण्यासाठी गेल्या काही दिवसांपासून इथे खड्डे खोदण्याचे काम सुरू होते. या खोदकामाने अग्निशमन केंद्राची इमारत आणि आसपासच्या इमारतींच्या स्ट्रक्चरला मोठे हादरे बसत होते. रहिवाशांनी विरोध केल्यानंतर काम तात्पुरती कामे बंद करण्यात आले. पुन्हा काम सुरू झाल्याने या प्रकरणी महापालिका आयुक्तांकडे साकडे घालण्याचा प्रयत्न प्रेस्टिज गार्डनर सोसायटीच्या नागरिकांनी केला. जाहिरात विभाग, अग्निशमन विभाग आणि महापालिकेच्या वरिष्ठ अधिकाऱ्यांच्या भेटी घेऊन त्यांनी आपली व्यथा मांडली. जाहिरात फलकास देण्यात आलेल्या परवानग्यांच्या कागदपत्रांची मागणी केली. परंतु कोणत्याही विभागाने त्यांना ती उपलब्ध करून दिली नाही. उलट माहिती अधिकारात अर्ज केलात तर ती मिळू शकेल, असे सूचना केली. त्यामुळे स्थानिकांनी संताप व्यक्त केला आहे.
या जाहिरात बॅनरमुळे हवा, सूर्यप्रकाशालाही अडथळा निर्माण होणार आहे. जाहिरातीच्या कोसळण्याच्या प्रकरणामुळे अग्निशमन केंद्रातील कर्मचाऱ्यांसाठी ही विषाची परीक्षा आहे. त्याला देण्यात आलेल्या परवानग्या उपलब्ध नसताना अत्यंत असुरक्षितपणे हे काम करून पालिकेने नागरिकांच्या संपत्तीचे नुकसान केल आहे.
सुरिंदर धीमान, स्थानिक रहिवासी