मतदान करून सेल्फी पाठवल्यास करसूट

म. टा. वृत्तसेवा, उल्हासनगर

यंदाच्या उल्हासनगर महानगरपालिकेच्या निवडणुकीत मतदानाची टक्केवारी वाढवण्यासाठी आयुक्त राजेंद्र निंबाळकर विविध युक्त्या योजत आहेत. त्याचाच एक भाग म्हणून जे मतदार मतदान केल्यानंतर २० जणांच्या ग्रुपसोबत सेल्फी काढतील, त्यांना मालमत्ता करात सूट मिळणार आहे. प्रथम १०० सेल्फींना प्राधान्य देणार आहे.

उल्हासनगरात मतदानाच्या टक्केवारीतील घसरण किंबहुना उदासीनता हा चिंतेचा विषय आहे. मतदानाचा टक्का वाढवण्यासाठी हॉटेल असोसिएशनसोबत बैठक घेत मतदान करणाऱ्या नागरिकांना हॉटेलमध्ये खाण्यावर २० टक्के सूट देण्याचा निर्णय घेतल्याचे आयुक्त राजेंद्र निंबाळकर यांनी सांगितले.