म. टा. वृत्तसेवा, पालघर
पालघर जिल्हा परिषद व त्यांतर्गतच्या आठ पंचायत समित्यांच्या आगामी सार्वत्रिक निवडणुकांसाठी ७ डिसेंबर रोजी प्रारूप मतदारयाद्या प्रसिद्ध केल्या जाणार आहेत.
प्रसिद्ध करण्यात येणाऱ्या याद्यांबाबत ११ डिसेंबरपर्यंत हरकती व सूचना दाखल करता येणार आहेत, अशी माहिती राज्य निवडणूक आयुक्त यू. पी. एस. मदान यांनी दिली. या निवडणुकांसाठी ४ ऑक्टोबर २०१८ रोजी अस्तित्वात असलेल्या विधानसभा मतदारसंघाच्या मतदारयाद्या ग्राह्य धरण्यात येतील. त्या आधारावर तयार करण्यात येणाऱ्या निवडणूक विभाग व निर्वाचक गणनिहाय प्रारूप मतदारयाद्या संबंधित ठिकाणी ७ डिसेंबर रोजी प्रसिद्ध केल्या जातील. त्या दिवसापासून त्यावर ११ डिसेंबरपर्यंत हरकती व सूचना दाखल करता येतील, असे मदान यांनी सांगितले.
निवडणूक विभाग व निर्वाचक गणनिहाय अंतिम मतदारयाद्या १६ डिसेंबर रोजी प्रसिद्ध केल्या जातील. मतदान केंद्रांची यादी व मतदान केंद्रनिहाय मतदारयाद्यादेखील त्याच दिवशी प्रसिद्ध केल्या जातील. निवडणूक विभाग व निर्वाचक गणनिहाय मतदारयाद्या तयार करताना विधानसभा मतदारसंघाच्या यादीप्रमाणेच प्रभागनिहाय मतदारयाद्यांमध्ये मतदारांची नावे व पत्ते कायम ठेवले जातात.
या याद्यांमध्ये नवीन नावांचा समावेश करणे, नावे वगळणे अथवा नावे किंवा पत्त्यांमध्ये दुरुस्ती करणे इत्यादी स्वरूपाची कार्यवाही राज्य निवडणूक आयोगाकडून केली जात नाही. हरकती व सूचनांच्या अनुषंगाने केवळ मतदारयाद्यांचे विभाजन करताना लेखनिकांकडून होणाऱ्या चुका, मतदारांचा चुकून प्रभाग बदलणे, विधानसभेच्या यादीत नाव असूनही प्रभागाच्या यादीत नाव नसणे आदींबाबत दुरुस्ती करण्यात येतात, अशी माहितीही मदान यांनी दिली.