खोदकामात जलवाहिनी फुटली

टिटवाळ्यात लाखो लिटर पाण्याचा अपव्यय

म. टा. वृत्तसेवा, कल्याण

मांडा-टिटवाळ्यात रस्त्यांची तसेच गटारांची कामे सुरू आहे. गटारे खोदताना पिण्याच्या पाण्याच्या जलवाहिन्यांकडे कंत्राटदाराकडून दुर्लक्ष होत असल्यामुळे या गटाराखालून जाणाऱ्या जलवाहिन्या फुटून लाखो लिटर पाणी वाया जाण्याच्या घटना नेहमीच घडतात. शनिवारी सकाळी ११ वाजण्याच्या सुमारास टिटवाळा विद्यामंदिर शाळेसमोर गटाराचे खोदकाम करताना तीन इंचाची जलवाहिनी फुटल्याने लाखो लिटर पिण्याच्या पाण्याचा अपव्यय झाल्याने नागरिकांमधून संताप व्यक्त करण्यात येत आहे.

एप्रिल-मे महिन्यात मांडा-टिटवाळ्यातील बऱ्याच भागात नागरिकांना पिण्याच्या पाण्याच्या टंचाईला सामोरे जावे लागते. दुसरीकडे प्रशासनाच्या हलगर्जीमुळे पाइपलाइन फुटून लाखो लिटर पिण्याच्या पाण्याचा अपव्यय होत आहे. शनिवारी सकाळी अकाराच्या सुमारास विद्यामंदिरसमोर नवीन गटार निर्मितीचे खोदकाम करत असताना गटारातून जाणारी ३ इंचाची पिण्याच्या पाण्याची वाहिनी फुटल्याने लाखो लिटर पाण्याचा अपव्यय झाला. संबंधित विभागाचा इंजिनीअर किंवा कंत्राटदार उपस्थित नसल्यामुळे लाखो लिटर पाणी वाहून गेले. त्यातच अधिकाऱ्यांना कळवूनही अधिकारी वेळेवर फिरकले नसल्यामुळे नागरिकांमधून संताप व्यक्त केला जात आहे. याबाबत ज्युनिअर इंजिनीअर उदय सुर्यवंशी यांनी गटाराच्या दुरुस्तीचे काम कंत्राटदारामार्फत सुरू असल्याचे सांगितले.