रस्त्यांच्या कामांमुळे स्वागतयात्रेचा मार्गबदल

महानगरपालिकेच्या कामांचा फटका

म. टा. वृत्तसेवा, डोंबिवली

डोंबिवली पश्चिमेला कल्याण-डोंबिवली महानगरपालिकेद्वारे रस्त्यांची कामे सुरू आहेत. संथगतीने सुरू असणाऱ्या या कामांचा फटका यंदा नववर्ष स्वागतयात्रेला बसताना दिसत आहेत. यंदाच्या वर्षी डोंबिवली पश्चिमेला सुरू असणाऱ्या कामांमुळे स्वागतयात्रेच्या मार्गामध्ये बदल करण्यात आला आहे.

डोंबिवली पश्चिमेकडे ठिकठिकाणी रस्त्यांची कामे सुरू आहेत. सम्राट चौक, दिनदयाळ पथ येथेसुद्धा रस्त्यांची कामे मोठ्या प्रमाणावर सुरू असल्याने हे मार्ग वाहतुकीसाठी बंद ठेवण्यात आले आहेत. त्यामुळे या मार्गावरून स्वागतयात्रेचे आयोजन करणे शक्य नसल्याने गणेश मंदिर संस्थानच्या वतीने स्वागतयात्रेसाठी नवीन मार्ग ठरवण्यात आला आहे. गेल्या दोन वर्षांमध्येसुद्धा स्वागतयात्रेसाठी रस्त्यांचे काम तात्पुरते करण्यात आले होते. मात्र तरीही रस्त्यांच्या कामांचा त्रास स्वागतयात्रेत झाला होता. यामधून महानगरपालिका बोध घेईल, अशी आशा असताना यंदाही त्याचीच पुनरावृत्ती झाली असून रस्त्यांच्या कामांचा फटका बसणार आहे.

यंदा डोंबिवली पूर्वेकडून पश्चिमेकडे जाण्यासाठी गुप्ते रोडचा वापर करण्यात येणार आहे. द्वारका हॉटेलच्या मार्गाने विष्णूनगर पोलिस ठाण्याजवळून स्वागतयात्रा डोंबिवली पूर्वेला जाणार असल्याचे गणेश मंदिर संस्थानच्या वतीने सांगण्यात आले. या स्वागतयात्रेदरम्यान बंद असलेल्या रस्त्यांवर वाहतूक कोंडी होऊ नये, या दृष्टीने वाहतूक व्यवस्थेचा विचार करून हे बदल करण्यात आले आहेत. रस्त्यांच्या कामांमुळे या मार्गामध्ये सध्या प्रचंड वाहतूक कोंडी होत आहे. त्यामुळे त्याचा विचार करून व्यवस्थापनाद्वारे निर्णय घेण्यात आला आहे. याचबरोबर स्वागतयात्रेच्या मार्गात चोख पोलिस बंदोबस्त ठेवण्यात येणार आहे. याद्वारे वाहतुकीचे नियोजन करून यंदा यात्रा पार पडणार आहे.