अल्पवयीन मुलीचे लग्न

मुलीच्या तक्रारीवरून नवऱ्यासह वडिलांना अटक

म. टा. वृत्तसेवा, उल्हासनगर

अल्पवयीन मुलीचे लग्न लावून देणे, तसेच नवऱ्याने या मुलीवर अत्याचार केल्याप्रकरणी विठ्ठलवाडी पोलिस ठाण्यात मुलीच्या वडिलांसह नवऱ्याला गुन्हा दाखल करण्यात आला आहे. पोलिसांनी या दोघांनाही अटक केली आहे.

विठ्ठलवाडी पोलिस ठाण्याच्या हद्दीत राहणारे संदीप पाटील (४२) यांनी त्यांचे नातेवाईक अनिल यांच्या मध्यस्थीने १८ दिवसापूंर्वी रिक्षाचालक संतोष मोहिते (२८) याच्याशी स्वतःच्या १७ वर्षीय मुलीचे मंदिरात लग्न लावून दिले होते. या मुलीच्या आई-वडिलांचा कौटुंबिक वाद असल्याने आई वेगळी राहत असल्याचा फायदा घेत तिच्या वडिलांनी तिचे लग्न लावून दिले होते. मात्र लग्नानंतर नवरा संतोष याने तिच्यावर अत्याचार केल्याने तिने अखेर आईला हा प्रकार सांगितला. त्यामुळे आईने मुलीला थेट विठ्ठलवाडी पोलिस ठाण्यात तक्रार देण्यास सांगितले. मुलीने दिलेल्या फिर्यादीवरून विठ्ठलवाडी पोलिस ठाण्यात वडील संदीप पाटील, नातेवाईक अनिल आणि नवरा संतोष मोहिते या तिघांविरुद्ध तक्रार दाखल केली.