बाइक रायडर जागृती होगळेचा खड्ड्याने घेतला बळी

मटा ऑनलाइन वृत्त । पालघर

जव्हार-डहाणू मार्गावर पडलेल्या खड्ड्यांनी प्रसिद्ध महिला बाइक रायडर जागृती होगळेचा (३५) बळी घेतला आहे. रविवारी सकाळी ९ वाजताच्या सुमारास चारोटीपासून काही अंतरावरील वेती गावाजवळ हा अपघात झाला.

वेती येथील या रस्त्यावर नवीन मोरी बनवली असून, त्यावर मोठा खड्डा पडला आहे. येथील स्थानिक ग्रामपंचायतीने याठिकाणी गतिरोधक निर्माण करावे म्हणून लेखी मागणी पत्रही दिले आहे; मात्र त्याची दखल सार्वजनिक बांधकाम विभाग घेत नसल्याने अपघात होत आहेत. जागृतीच्या बुलेटला इथेच अपघात झाला.

जागृती ही वुमन्स ओन्ली बायकरनी ग्रुपच्या सदस्या होती. तिने लेह आणि लडाखचीही बाइक सफर केलेली होती. काल ती मृणाल नायर आणि ज्ञानदा म्हसकर या नवी मुंबईत राहणाऱ्या दोन अन्य क्लब सदस्यांसह बाइक रायडिंगला जव्हारला निघाली होती. जागृती मुंबईतील वांद्रे-खेरनगर येथील श्रीराम हाऊसिंग सोसायटीत राहायची. तिथूनच सकाळी ८ वाजताच्या सुमारास या तिघी तीन बुलेट घेऊन निघाल्या. दरम्यान, जव्हार-डहाणू मार्गावर वेती येथे एका ट्रकला ओव्हरटेक करत असताना बाइक खड्ड्यात गेली आणि जागृती खाली कोसळली. ट्रकच्या मागच्या चाकाखाली येऊन तिचा जागीच मृत्यू झाला.

याप्रकरणी कासा पोलीस ठाण्यात गुन्हा दाखल करण्यात आला आहे.

दरम्यान, जागृतीच्या पश्चात पती विराज आणि ९ वर्षांचा मुलगा हर्षित असून जागृतीवर रविवारी रात्री अंत्यसंस्कार करण्यात आले. यावेळी बायकर्स क्लबचे सदस्य मोठ्या प्रमाणात उपस्थित होते. जागृतीच्या अपघाती मृत्यूने या क्लबला मोठा धक्का बसला आहे.