महिला मार्शलला धक्काबुक्की

म. टा. वृत्तसेवा, कल्याण : उघड्यावर कचरा टाकण्यापासून नागरिकांना परावृत्त करणाऱ्या महिला मार्शलला मद्यपीकडून धक्काबुक्की करण्यात आल्याची घटना गुरुवारी सकाळी डोंबिवली येथील आंबेडकर चौक परिसरात घडली. या मार्शलने धक्काबुक्की करणाऱ्या मद्यपीवर स्वसंरक्षणार्थ चावीने केलेल्या हल्ल्यात तो जखमी झाला आहे. या प्रकरणात पोलिसांकडे परस्परविरोधी तक्रारी दाखल झाल्या आहेत.

महापालिकेने स्वच्छतेवर देखरेख ठेवण्यासाठी शहरात मार्शलची नेमणूक केली असून त्यांना उघड्यावर कचरा टाकणाऱ्यांकडून दंड वसूल करण्याचे अधिकार देण्यात आले आहेत. गुरुवारी सकाळी डोंबिवलीमधील आंबेडकरनगर परिसरात प्लास्टिकच्या पिशवीत कचरा फेकणाऱ्या महिलेला पालिकेने नेमलेल्या महिला मार्शलने हटकले. कचरा टाकल्याबाबत दंड भरण्यास सांगून त्याची रीतसर पावती फाडत असताना बाजूलाच दारू पीत बसलेल्या काही मद्यपींमधील विजय मोरे याने मार्शलशी हुज्जत घातली. सदर महिला मार्शलने त्याच्याकडे दुर्लक्ष केले. मात्र, नशेत असलेल्या मोरे याने सदर महिलेला धक्काबुक्की करत तिचा गळा पकडण्याचा प्रयत्न केला. या आरडाओरड्यामुळे आजूबाजूचे नागरिक गोळा झाले. मात्र, सर्वांनी बघ्याची भूमिका घेतली. बचावासाठी महिला मार्शलने हातातील गाडीच्या चावीने मोरे यांच्या पोटावर वार केला. यात मोरे रक्तबंबाळ झाले. दरम्यान, या घटनेचा व्हिडीओ व्हायरल होताच नागरिकाच्या संतप्त प्रतिक्रिया उमटू लागल्या असून संबंधित मार्शलवर कारवाई करण्याची मागणी होऊ लागली आहे. याप्रकरणी रामनगर पोलिसांकडे परस्परविरोधी तक्रारी दाखल झाल्या आहेत. प्राथमिक तपासणीत सदर महिलेने स्वसंरक्षणासाठी वार केल्याचे दिसत असून याप्रकरणी चौकशी करून कारवाई केली जाईल, असे सहाय्यक पोलिस आयुक्त जे. डी. मोरे यांनी सांगितले.

पालिका प्रशासनाकडून उघड्यावर कचरा टाकू नका, कचरा घंटागाड्यामध्येच द्या, असे आवाहन करतानाच चाळी आणि झोपडपट्टी परिसरात घंटागाड्यांच्या वेळाही ठरवून देण्यात आल्या आहेत. तरीही नागरिक घरातील कचरा रस्त्याच्या कडेला फेकतात. ही सवय मोडण्यासाठी पालिका प्रशासनाने पालिका कर्मचारी, ठेकेदारांचे कर्मचारी आणि मार्शल यांची नेमणूक केली आहे. मात्र, त्यांना नागरिकांकडून अद्यापही सहकार्य मिळत नसल्याचे चित्र आहे.