म. टा. वृत्तसेवा, पालघर
जव्हार तालुक्यातील देहेरा देवगावातील महिलांनी दारू बंदीची हक दिली असून
ग्रामपंचायत क्षेत्रातील महिलांनी दारूबंदीची रॅली काढून जनजागृती केल्याने प्रशासनाचे धाबे दणाणले आहेत.
संपूर्ण महाराष्ट्रात दारूबंदीचा गाजावाजा होत असतानाही जव्हार तालुक्यातील आदिवासी ग्रामीण भागात आजही व्यसनाधिनतेचे प्रमाण प्रचंड आहे. मात्र दारूची विक्री राजरोसपणे सुरू असते. या आदिवासी भागातील अनेक कुटुंबे दारूच्या व्यसनामुले उध्वास्त झाली आहेत. महिला ग्रामस्थांनी याबाबत वारंवार नाराजी व्यक्त करूनही सरकारने तालुक्यात दारूबंदी लागू न केल्याने अखेर महिलांनीच या समस्येवर तोडगा शोधण्याचा निर्णय घेतला आणि रॅली काढली. ग्रामपंचायत हद्दीतील महिलांनी एकत्र येऊन ग्रामसभेत याबाबत ठराव केला. तसेच प्रत्येक गाव-पाड्यात जाऊन दारूबंदीसाठी भव्य रॅली काढून जनजागृती केली.
जव्हार तालुक्यातील शंभर टक्के आदिवासी लोकवस्ती असलेली देहेरा देवगाव ग्रामपंचायत आहे. या ग्रामपंचायत हद्दीत देहेरा, देवगाव, उक्षीपाडा, कडव्याचीमाळी, बोरीचामाळ, जळविहिरा, नवापडा, खडकीपाडा असे आठ गाव पाडे असून, या ग्रामपंचायतीची लोकसंख्या सुमारे ३ हजार ५४३ आहे. या देहेरे ग्रामपंचायतीत आदिवासी विकास विभागाचे आश्रम शाळा, ज्युनिअर कॉलेज आहे. प्रत्येक गावात जिल्हा परिषद शाळा आहेत. मात्र संपूर्ण महाराष्ट्रात दारूबंदी असतानाही देहेरा देवगाव ग्रामपंचायतीत दिवसेंदिवस दारू विक्रीचे व दारू पिणाऱ्यांचे प्रमाण वाढत होते. अनेक कुटुंबांचे संसार उघडयावर येवुन वाद, भांडणे निर्माण झाली होती.
देहेरा देवगाव ही ग्रामपंचायत दादरानगर हवेलीला लागून असल्याने दमण दारूची विक्री या गावात मोठ्या प्रमाणात होत असल्याचे येथील महिलांनी सांगितले. देहेरा देवगाव ग्रामपंचायतीत उघडपणे दारूविक्रीमुळे अनेकांचे संसार उघड्यावर आल्याचेही सांगितले. तसेच वाद, भाडंण, तंटे रोजचेच झाल्याने त्याचा त्रास गावांतील महिला व मुलांना होऊ लागला होता, अखेर महिलांनी एकत्र येऊन दारूबंदीसाठी रॅली काढण्याचा निर्णय घेतला.
देहेरा देवगाव ग्रामपंचायतीतील महिलांनी व सरपंच, सदस्य, महिलावर्ग यांनी आदेश काढले आहेत. त्यानुसार दारूविक्री करणाऱ्याकडून एक लाख रुपयांचा, गुळाची विक्री करणाऱ्या दुकानदारांकडून ५ हजार रुपयांचा दंड तर बाहेर गावातून दारू पिवून येणाऱ्याकडून २५ हजार रुपयांचा वसूल केला जाणार आहे.