गणेशवाडीत विसर्जनाचा मान महिलांना

म. टा. प्रतिनिधी, ठाणे

नदी, तलावांमध्ये गणेश विसर्जनामध्ये प्रामुख्याने पुरुष मंडळी अग्रभागी असली तरी महिलांनाही गणेश विसर्जनातून गणेशोत्सवातील एका भावपूर्ण घटनेचे साक्षीदार होण्याची इच्छा असते. परंतु यासाठी महिलांचा पुढाकार दिसत नसल्यामुळे कल्याणच्या गणेशवाडी परिसरात गणेश विसर्जनाचा मान महिलांना देण्याचा निर्णय घेण्यात आला आहे. या परिसरातील कॉमन मॅन चौकामध्ये कृत्रिम हौदामध्ये गणेश विसर्जन केले जात असून यंदा अनंत चतुर्दशीच्या दिवशी गणेश विसर्जनाचा मान महिलांना देण्याचा निर्णय घेण्यात आला आहे. स्थानिक नगरसेविका सुमन निकम यांच्या संकल्पनेतून माजी नगरसेवक नितीन निकम यांनी यासाठी पुढाकार घेतला आहे.

कल्याणमध्ये गणेश विसर्जनासाठी कृत्रिम तलावांची संख्या कमी असली तरी शहरात लोकसहभागातून गणेश विसर्जनाचे कृत्रिम हौद तयार करण्याचा प्रयत्न गणेशवाडी परिसरातून झाला. गेल्या दोन वर्षांपासून या भागात कृत्रिम हौदामध्ये गणेशविसर्जन केले जाते. यंदाही गणेशविसर्जन सोहळा होणार आहे. घरामध्ये दहा दिवस गणपतीचे आगमन, पूजा, आरती आणि प्रसाद देण्यामध्ये महिलांचा अग्रभाग असतो. विसर्जन हा अत्यंत भावपूर्ण क्षण असून महिलांनाही गणपतीचे विसर्जन करण्याची इच्छा असते. मात्र त्यांना हा मान दिला जात नसल्याने गणेशवाडीतून ही संकल्पना राबविण्याचा निर्णय यंदापासून घेण्यात आला आहे. त्यामुळे शहरातील नागरिकांनी या ठिकाणी येऊन गणेशमूर्तींचे कृत्रिम हौदामध्ये विसर्जन करण्याचे आवाहन नितीन निकम यांनी केले आहे. गणेशवाडीतील नागरिकांनी या उपक्रमाला पाठिंबा दिला असून कृत्रिम हौदासाठी लोकवर्गणी देऊ केली आहे. त्यामुळे एक आदर्श उपक्रम या भागात पहायला मिळणार आहे.